Polisia Nasional Timor-Leste simu tan kareta neen (6) husi Timor-Leste Police Development Program (TLPDP), ho intensaun atu fasilita servisu PNTL nian ho professional liu tan iha future.
Komandante Jeral Polisia Nasional Timor-Leste (PNTL), Komisariu Longuinhos Monteiro, hateten kareta hirak ne’e sei fo liu asistensai ba asidente trafiku.
“Dala barak ita depende liu ba ambulansia, maibe iha tempu hanesan ambulansia mos sei atende hela ema ne’ebe ho kazu hanesan,” Komisariui Monteiro hateten, iha Kaikoli, Dili.
Kareta sira ne’e, nia afirma, sei para hotu iha estasaun polisia nia oin, atu nune’e wainhira mosu asidente ruma, bele halo atendementu ho lalais.
“Ita nia atendementu sei lalais liu tan e ita nia resposta ba kualker xamada asidente,” nia hateten.
Nia hatutan, kareta hirak ne’e sei fahe ba Estasaun Polisia iha Becora hamutuk rua no iha Comoro hamutuk rua.
Enkuantu membru Komisaun B (seguransa, defeza no negosiu estranjeirus), Deputadu Cesar Valente de Jesus, hateten TLPDP nudar parseiru ne’ebe diak, e durante ne’e sira fo ona apoia barak ba PNTL.
“Durante ne’e difikuldade bo’ot ida iha PNTL maka fasilidade hanesan transporte, tanba ne’e kareta hirak ne’e ajuda tebes,” Deputadu de Jesus hateten.
Tanba ne’e nia husu ba PNTL atu uja didiak kareta hirak ne’e no presiza halo manutensaun ho rutina, nune’e polisia sir abele uja nafatin.
