Membru Parlamentu Nasional sujere ba Ministeriu Administrasaun Estatal atu fo fiar ba Administrasaun Sub-distritu hodi organiza bainhira selebra loron nasional ruma, nune’e sira bele organiza povu atu partisipa diak liu tan.
Deputadu Cristovao Barros,hateten durante povu sira iha distritus ladun partisipa iha selebrasaun loron nasional ruma, tanba atividade tomak organiza husi nasional.
“Labele konsentra deit iha nivel distritu, fo poder mos ba administrador sub-distritus atu sira mos bele hola parte iha loron nasional ruma no sente,” Deputadu Barros hatetenn iha Parlamentu Nasional.
Entretantu Deputadu husi bankada Fretilin, Manuel Gaspar Soares da Silva, hateten tinan-tinan selebrasaun loron nasional ruma iha nivel distrital kapaas, maibe povu la sente.
“Bainhira inagura sentral eletrika iha Betano, ami ba iha ne’eba no povu halerik ba ami, katak osan barak mak gasta iha ne’e, maibe ami la sente tanba programa hotu-hotu konsentradu hotu,” Deputadu Gaspar hateten.
Ezemplu hanesan iha loron 20 Agostu 2013 osan barak mak gasta ba halo inagurasaun Sentral Eletrika Betano maibe povu iha area ne’eba la sente.
“Sira husi nasional deit mak mai halo maibe ami povu ki’ik iha ne’e ami nunka hetan osan ida ne’e,” nia dehan.
La’os ne’e deit, nia dehan, komemorasaun levantamentu Craras 28 Novembru iha distritu Viqueque depois serimonia isar bandeira hotu, to’o agora fatin ne’e izola deit.
“Servisu hotu-hotu ba iha ne’eba mos ema husi nasional deit mak ba, maibe povu ne’eba ne’e la halo buat ida ,” nia kestiona.
Tanba ne’e nia sujere ba MAE, ba futuru iha loron nasional distrital fo poder mos ba administrador distritu no sub-distritu sira hodi hala’o eventu nasional sira.
Hatan ba kestaun ne’e Ministru Administrasaun Estatal (MAE), Jorge da Conceicao Teme, katak komemorasaun loron nasional rua (Luak no Craras) ne’e maske MAE mak organiza maibe sempre halo koordenasaun ho administrasaun distritu, sub-distritu, xefe suku , xefe aldeias inklui lian nain sira.
“Iha ami nia preparasaun ba serimonia distrital, ami sempre involve sira ne’ebe mai husi distritus,” Ministru Teme hateten.
Nia dehan, ba povu babain sira sempre koordena liu husi administrador distritu no sub-distritu, xefe sukus inklui xefe aldeia sira.
