Iha tempu badak konselho administrasaun Ospital Nasional Guido Valadares sei implementa sistema atendementu foun iha ospital nasional, fo atendementu ba moras sira ne’ebe presiza intervensaun urgensia husi medikus sira.
Diretor Klinika HNGV, Doutor Aniceto Barreto, hateten sira sei muda sistema atendementu liu –liu moras jeral sira (inus been, isin manas, mear) ne’e mai iha HNGV liu –liu sala emergensia sei haruka fila ba iha sentru saude sira.
Dr.Maia hateten, sala emergensia HNGV durante ne’e nia funsaun la’o ladun los, tanba moras jeral sira mos para hotu iha sala emergensia, entaun dificulta pesoal saude sira atu halo intervensaun ba kazu emergensia sira.
“Moras hanesan inus been, mear, isin manas ne’e nia fatin la’os iha emergensia, emergensia ne’e kazu ne’ebe emergensia duni presiza intervensaun husi medikus,” nia preokupa.
Nia dehan, ida ne’e akontese tanba populasaun nia komprensaun ba definisaun emergensia sei minimu no presiza fo hatene.
Entretantu Ministru Saude, Sergio da Costa Lobo, promete iha tinan ida ne’e governu sei haforsa servisu sentru saude sira iha teritorio tomak, liu –liu Dili nune’e bele diminui numeru pasientes iha HNGV.
“Tinan ida ne’e ami sei haforsa servisu sentru saude sira hotu atu bele fo atendimentu primeiru ba populasaun sira,” dehan Lobo.
Iha parte seluk, Deputada Ilda Maria da Conçeicão, konkorda ho sistema ida ne’e atu pasiente sira ne’ebe moras baibain tenke haruka fila ba sentru saude sira nune’e labele prejudika pasiente sira ne’ebe urgente.
“Presiza sosializa ba ita nia komunidade liu –liu sentru sira ne’e atu sira bele komprende funsaun emergensia ne’e,” Deputada Ilda sujere.
