Membru Parlamentu Nasional sujere ba Ministeriu Administrasaun Estatal (MAE) atu monta fatin lixu iha bairo-bairo, atu nune’e komunidade sira bele soe foer iha fatin ne’ebe los.
“Hau la hatene, nusa mak la konstrui fatin lixu iha bairo sira,” Deputadu Cesar Valente de Jesus hateten, iha Parlamentu Nasional.
Deputadu husi bankada Congresu Nasional Rekonstrusaun de Timor ne’e mos husu ba governu tenke monta baskolante iha bairo –bairo, atu nune’e komunidade sira bele soe lixu.
“Ne’e para ekipa saneamentu sira mai raut deit ona,” nia hato’o.
Tuir nia observasaun iha kapital Dili durante ne’e, katak fatin lixu ne’ebe mak monta ona balun komunidade sobu sai hotu, ida ne’e akontese tanba laiha kontrolu husi ministeriu kompetente.
“Ita la konsege konserva para buat ne’e ba oin kontinua uja,” nia dehan.
Iha fatin hanesan Deputadu Adriano Joao sujere ba MAE atu kria lei ne’ebe mak rigorozu, nune’e komunidade sira la bele soe foer arbiru.
“Atu nune’e bele fo sansaun ba ema ne’ebe soe foer arbiru,” nia dehan.
Hatan ba preokupasaun ne’e Ministru Jorge da Conceicao Teme, katak kada distritu ida ekipa saneamentu destaka iha ne’eba hamutuk ema nain 10 inklui kareta saneamentu ida hodi raut foer.
“Iha distritu Dili ita iha 300 pessoas ho kareta 30,maibe kareta ida loron ida nia foti foer dala tolu ita selu $ 65,00,” Ministru Teme dehan.
Nia dehan, iha tinan ida ne’e MAE aloka tan orsamentu kada suku iha distritu Dili mil dolares, enkoraja xefe suku sira hodi mobiliza foinsa’e sira iha kada suku atu bele partisipa limpeza kada suku ida –idak nian.
Ministru mos rekonese, katak fatin lixu iha sidade Dili balun at no balun hetan estragus husi ema ne’ebe mak laiha responsabilidade.
