Orsamentu Jeral do Estado (OJE) 2014, Ministerio Saude propoin $13 miloens hodi resolve problema aimoruk no konsumoveis inklui mos fasilidade medikus ne’ebe durante ne’e povu preokupa no kestiona. 
Prezidente Komisaun F (saude, edukasaun, kultura, igualidade jeneru no veteranus), Deputadu Virgilio da Costa Hornai, hateten tinan ida ne’e orsamentu ba medikamentus bo’ot kompara ho tinan kotuk (2013) iha deit $5 miloens.
Nia hateten, durante ne’e problema aimoruk nunka resolve tanba faila iha jestaun, laiha indikasaun ida diak kona ba items aimoruk sira ne’ebe fasilidade saude sira presiza, kompras arbiru deit.
“Ne’ebe la’os osan mak laiha, maibe falta de jestaun,” Deputadu Hornai hateten.
Nia hateten, orsamentu ida ne’e atu kompras mos ambulansia ba fasilidade saude sira hotu iha teritorio tomak, tanba durante ne’e fasilidade saude barak mak sei falta ambulansia.
Iha fatin hanesan Deputadu Manuel Gaspar Soares da Silva, husu ba Ministerio Saude atu hadia jestaun ba medikamentus nian, nune’e povu labele sai vitima nafatin tanba osamentu ba tinan ida ne’e bo’ot atu kompras aimoruk.
Entretantu Ministru Saude, Sergio da Costa Lobo, rekonese katak jestaun aimoruk sei sai preokupasaun bo’ot, maibe ministerio komesa hadia ona atu bele iha dadus ba gastus ne’ebe iha.
“Problema monitorizasaun gastus ita la hatene, saida mak sira gasta iha distritu, maibe hahu tinan ida ne’e ita estandariza ona patraun lista aimoruk kada fasilidades,” Ministru Lobo hateten.
Nia dehan, atu garantia distribuisaun aimoruk ba fasilidade saude hotu, sira hadia ona sistema armajenamentu iha SAMES no kapasita ona jestor sira atu jere aimoruk sira ne’ebe distribui ba fasilidade saude.
