Organizasaun Forum Komunikasaun Feto Timor –Leste (FOKUPERS) iha planu atu halo peskiza ida kona ba konesementu komunidades nian ba saude reprodutivu. 
Koordenadora Programa Advokasia, Honoria Lopes, hateten peskiza ne’e hala’o ho intensaun atu identifika obstaklu ne’ebe inan feto sira hasoru, liga ho sira nia saude reprodutivu, tanba iha inan no feto foinsa’e barak mak la fo importansia ba sira nia saude tanba falta konesementu.
“Saude reprodutiva tama ona iha ami nia planu no oras ne’e dadaun ami nia ekipa tun ona ba baze halo asessment oinsa halo peskiza kona ba ida ne’e,” Koordenadora Lopes hateten, iha Parlamentu Nasional.
Nia hatutan, peskiza ne’e sei hetan fundus husi agensia internasional UNFPA ho durasaun fulan neen no distritu rua mak sai alvu ba peskiza ne’e, distritu Ermera no Dili, liu-liu sub-distritu Metinaro no Atauro.
Entretantu Sekretaria Estado ba Promosaun Igualidade (SEPI), Idelta Maria Rodrigues, apresia ba FOKUPERS ne’ebe iha interese atu halo peskiza kona ba igualidade jeneru, ne’e hanesan baze ida atu halo advokasia, maibe importante mos servisu hamutuk ho sentru estudu jeneru Universidade Nasional Timor –Lorosa’e.
Nia dehan, SEPI halo ona akordu ida ho sentru estudu jeneru hodi halo peskiza kona ba asuntu igualidade jeneru ne’ebe estado no ema hotu preokupa atu identifika kauza hodi halo asaun.
“Organizasaun sira ne’e mos presiza servisu hamutuk ho sentru estudu jeneru, tanba ita harii tiha ona,” SE Rodrigues hateten.
Nia hateten, governu sei fortifika servisu sentru estudu nian hodi prepara sentru ne’e sai hanesan sentru nasional ida ba estado, atu se deit mak presiza dadus ruma kona ba igualidade jeneru bele vizita deit sentru estudu ne’e.
Nia dehan, iha peskiza lubuk ida mak sentru estudu hala’o ona hanesan peskiza kona ba feto drop out husi eskola tanba gravidas, feto iha agrikultura no planu ba tinan ida ne’e sei halo peskiza feto iha bee no sanitasaun.
