Tribunal Distrital Dili (TDD) halo julgamentu ba kazu violensia domestika iha ne’ebe vitima MB sempre hetan baku husi nia kaben ho inisial FS, tanba diskunfia fen selingkuh ho mane seluk.
Vitima MB deklara iha tribunal, katak nia sempre hetan baku husi arguido FS, tanba arguido la kontente wainhira MB koalia halimar ho mane oan sira iha estrada inklui vitima nia primu rasik.
Kazu ne’e rasik akontese iha bairo Ailok laran, iha 24 Marsu 2011, no vitima rekonese katak FS hanesan tipu ema ne’ebe diskunfia door no desde sei namora kedas to’o hola malu forma uma kain.
“Tanba iha oan uluk ona, ne’ebe pasensia deit ona,” vitima MB hateten, iha Tribunal Distrital Dili (TDD), Mandarin, Dili.
Nia deklara tan katak, arguido mos sempre baku bainhira vitima fila servisu la tuir oras, maske tarde tanba engrafamentu iha estadas, maibe FS diskunfia katak vitima sei ba pasiar ho mane seluk mak fila uma tarde.
“Hanesan nia mak to’o uluk iha uma, entaun ne’e nia deskonfia dehan hau sei ba selingkuh ho mane-mane sira,” nia deklara.
MB hateten, arguido baku vitima sempre buka parte ain no kotuk laran deit. “Nia baku ikus ne’e maka to’o hau mate ki’ik tiha, entaun hau nia alin ba lapor polisia tiha,” vitima MB deklara tan.
Entretantu iha deklarasaun iha tribunal, arguido FS rekonese hotu hahalok hirak ne’ebe nia halo ba nia kaben MB (vitima), tanba trauma ho esperiensia fen primeiru nian.
“Hau nia fen primeiru soe malu tanba nia hola mane seluk, hau lakohi kazu ne’e akontese fali, ne’e mak hau diskunfia,” arguido FS deklara.
Durante prosesu ne’e la’o hela vitima no arguido sei nafatin hela iha uma ida no MB dehan, arguido FS arepende ba hahalok ne’ebe nia halo, no komesa iha mudansa hafoin TDD julga sira.
Hafoin rona tiha deklarasaun husi vitima no arguido, Juis Prezident, José Maria de Araújo, deside fo suspensaun tinan ida ba arguido, se kuandu arguido halo tan hahalok ne’e, arguido sei submete direitamente ba prizaun.
