Sekretariu Estadu Seguransa (SES) iha ona planu sei sosa tan armas ba Polisia Nasional Timor Leste (PNTL), tanba unidade balun sei menus armas.
Sekretariu Estadu, Francisco Guterres, hateten mesmu iha tinan kotuk konsege sosa ona kilat ho tipu V1-PM2 hamutuk 72, maibe ne’e seidauk to’o.
“Ne’ebe nesesidade duni atu sosa tan kilat liu-liu ba Unidade Polisia Fronteira,” SE Guterres hateten, iha Parlamentu Nasional.
Nia dehan, proposta orsamentu ba planu ida ne’e hatama ona iha Parlamentu Nasional, agora hein desizaun deit.
“Depende ba iha Parlamentu, kuandu aprova ita sosa, laiha la problema, agora ita seidauk bele determina atu sosa hira,” nia dehan.
Maibe, nia dehan, governu presiza reforsa Polisia Fronteiras (UPF) ho fasilidades hanesan kilt, transporte no ekipamentus seluk ne’ebe relasiona ho sira nia servisu.
“Intensaun mak atu prevene krimi organizadu ne’ebe dala ruma bele mosu iha fronteiras,” nia hateten.
Iha parte seluk membru Komisaun B (negosiu estranjeirus, seguransa no defeza), Deputadu Cesar Valente de Jesus, hateten Komisaun B apoia planu ida ne’e no sei defende atu sosa duni kilat ba UPF, maibe tenke hare nia mekanismu.
Nia dehan, proposta ne’e sei tau lai iha Ministeriu Defeza hodi hein komisaun eventual hodi halo prosesu akizasaun armas.
“La’os deit ba PNTL, maibe sosa mos ba F-FDTL sira,” membru Komisaun B husi bankada CNRT ne’e hateten.
Nia dehan, presiza halo normas klaru, atu nune’e bele kontrola kilat sira ne’e, tantu membru sira ne’ebe kaer no ba kompania ne’ebe governu sosa ba.
“Hanesan kompania ida hetan tiha lisensa atu fa’an kilat no ita sosa, depois ita la kontrola kompania ne’e bele hatama mos kilat ho illegal mai ita nia rain, ita la hatene” Deputadu de Jesus hateten.
