Atu kombate transmisaun virus HIV/SIDA iha rai laran membru Konselho Comissão Nasional de Combate ao HIV/SIDA Timor –Leste (CNCS-TL) hamutuk ho Sosiedade sivil sira diskute planu estrategiku no asaun ne’ebe komisaun presiza halo hodi redus no prevene transmisaun virus ne’e. 
Prezidente CNCS-TL, Fernando Lasama de Araújo,rekonese katak servisu lubuk ida mak hala’o ona durante ne’e, mais sei fraku tanba ne’e governu deside estabelese CNCS atu hare ba kestaun ne’e, katak problema HIV/SIDA instituisaun hotu nia preokupasaun.
“Hau konvida parte hotu atu ativu, ne’e la’os ema ida nia problema maibe problema nasional,” Prezidente CNCS Lasama hateten, hafoin hala’o enkontru ho Konselhu Ezekutivu Komisaun, iha Palasiu Governu.
Atual Vise Primeiru Ministru ne’e konvida mos jornalista sira atu fo atensaun ba problema HIV/SIDA liu husi servisu jornalismu, informa asuntu ne’e ba iha publiku, atu sir abele hatene no buka solusaun.
Entretantu Sekretario Ezekutivu CNCS-TL, Daniel Marçal, hateten iha Marsu nia laran komisaun hahu halo sosializasaun kona ba edukasaun prevensaun ba publiku, maibe komisaun mos presiza dekretu lei no regiment internu ida.
“Komisaun ne’e harii la’os atu taka tiha NGO sira seluk nia programa, maibe atu kordena atividades sektorais hotu inklui NGO sira ne’ebe durante ne’e hala’o ona edukasaun prevensaun hodi habelar tan informasaun sira ne’e ba komunidades,” Marçal hateten.
Iha fatin hanesan Ministru Saude, Sergio da Costa Lobo, hateten ministeriu halo ona buat balun liga ba atendimentu no edukasaun prevensaun, maibe sei iha difikuldades hanesan rekursu finanseirus no rekursu humanu.
Nia dehan, prezensa komisaun ne’e importante tebes, atu nune’e ministerio bele foka deit ba iha tratamentu saude kona ba edukasaun prevensaun, koordena ho instituisaun seluk hodi halo kampanha.
“Ami loke ona klinika espesifiku ba HIV/SIDA, maibe ema lakohi ba tanba bainhira sira ba, sira hatene ona sira moras, ita tenke integra hanesan pakote ida ho apoiu husi estado no governu hodi hasa’e konsiensia komunidade nian,” ministru Lobo dehan.
Enkuantu instituisaun ne’ebe involve iha komisaun ne’e, mak Ministeriu Saude, Ministeriu Edukasaun, Ministeriu Administrasaun Estatal, Ministeriu Solidaridade Sosial, Sekretario Estado ba Promosaun Igualidade, Sekretario Estado Joventude e Desportu, Sekretario Estado Politika Formasaun Profesional e Empregu, F-FDTL, PNTL, setor privadu inklui sosiedade sivil.
