Organizasaun Forum Tau Matan (FTM) sei halo monitorizasaun ba implementasaun programa merenda eskolar iha eskola hotu iha rai laran, maibe antes ne’e sei asina akordu ho Ministeriu Edukasaun iha fulan Fevereiru ne’e.
“Ami hetan ona konvite husi Ministeriu Edukasaun atu hare hamutuk kona ba dezenvolvementu politika implementasaun merenda eskolar,” Project Manager Kids Protection FTM, Honorio Almeida Soares hateten, iha Kaikoli, Dili.
Nia dehan, FTM sei servisu hamutuk ho Ministeriu Edukasaun(ME) atu halo monitorizasaun ba implementasaun programa merenda eskolar iha distritu hotu.
“Ami iha planu bo’ot ne’ebe mak fiksu sei aprezenta ba Ministeriu Edukasaun atu elabora hamutuk hodi dezenvolve diak liutan iha prosesu distribuisaun no prosesu jestaun ba politika merenda eskolar ne’e rasik,” nia hateten.
Nia informa, dadaun ne’e sira iha ona faze preparasaun, tanba primeiru ekontru sira halo ona ho ME no hein atu tama ba enkontru tuir mai atu diskute diak liu tan kona ba politika monitorizasaun ninian.
Organizasaun hirak ne’ebe sei asina akordu ho ME ba programa ne’e mak hanesan FOKUPERS, Belun, Sentru Nasional Juventude Timor-Leste, Provedoria dos Direitus Humanus, rede edukasaun Timor-Leste Coalition for Education inklui FTM rasik.
Iha sorin seluk Deputadu Leonel Marcal, duvida katak osan ba merenda ekolar ne’ebe sa’e husi 15 sentavus kada estudanteba 25 sentavus, sei la to’o.
“Ema ne’ebe iha kompresaun diak ,nia jere osan ne’e didiak osan ne’e to’o ba iha alunus sira, maibe balun ne’ebe mentalidade la diak, nia bele foti balun husi 25 sentavus ne’e,” Deputadu Marcal hateten.
Tanba ne’e nia sujere ba Ministeru Edukasaun, tenke kontrola osan ne’e nune’e to’o iha baze no laiha manipulasaun.
Hatan ba preokupasaun ne’e Ministru Edukasaun, Bendito Freitas, katak ministeriu halo ona enkontru ho diretor jeral sira atu halo politika ida kompletu kona ba ezekusaun ba jestaun merenda eskolar.
“Labele alunus ida han ho valor 15 sentavus nian, maibe relatoriu mai dehan $25 sentavus, ida ne’e lakohi akontese tan,” ministru dehan.
