Ministru Komersiu Industria no Ambiente (MKIA), Antonio da Conceicao, promete katak semana oin folin fos ne’ebe dadaun ne’e sa’e maka’as fila ba normal ona, tanba roo rua ne’ebe tula fos mai Timor-Leste deskarega ona iha Portu Dili.
Nia dehan, durante ne’e fos folin sa’e tanba problema armajen Vietnam ninian lokaliza hotu hodi fo asistensia umanitaria iha Filipina.
“Hau intervensaun tiha, agora laiha problema ona atu despozisaun fos iha Vietnam mai iha Timor,” Ministru Antonio da Conceicao hateten, iha Parlamentu Nasional.
Nia hateten, problema ne’ebe dadauk ne’e infrenta mak deskaregamentu roo iha Portu Dili, tanba funsionariu ne’ebe mak servisu iha ne’eba protestu maka’as no lakohi servisu iha loron Sabadu no Domingu, hakarak over time.
Kona ba Lei Presu Justu, nia dehan, oras ne’e dadaun lei ne’e la’o hela, maibe regula 10% deit ba benefisiu komersial sira.
Nia dehan, atu regula folin sasan sira wainhira merkadu funsiona, presiza dispozisaun material.
“Agora problema ne’e dispozisaun sasan iha merkadu mak menus,” nia hateten.
Entretantu Deputada Bendita Moniz Magno, hateten folin fos iha merkadu oras ne’e dadauk 25kg fa’an ho $19,00.
“Ami sei husu esklaresementu husi ministeriu kompetente kona ba asuntu ne’e tanba saida mak folin fos ne’e sae,” nia hateten.
Tuir nia, folin fos ne’ebe maka’as iha merkaduria fo impaktu ba iha povu ki’ik sira ne’ebe kbi’it la to’o.
Iha fatin hanesan Sekretariu Estadu Industria no Koperativas (SEIK), Filipus Nino Pereira, hateten produtu lokal ne’ebe oras ne’e dadauk iha armajen mak hanesan fos ,batar no fore.
Nino Pereira hateten, fos iha armajen provolta 5 to’o 6 mil toneladas, depois batar provolta 25 toneladas no fore provolta 15 mil toneladas.
“Ita hein para atu halo nia distribuisaun, tantu komunidade sosa direita inklu programa merenda eskolar bele kopera ho Ministeriu Komersiu Industria para bele hahu distribuisaun ba iha ne’eba,” SE Pereira hateten.
