Parlamentu Nasional aprova $1,000 ba programa hakbi’it ekonomia feto rural, tanba durante ne’e ekonomia mak sai problema bo’ot ba feto sira hasoru.
Deputada proponente, Albina Marçal Freitas, hateten feto maluk iha area rural barak mak sai vitima ba violensia domestika, maibe sira labele keixa kazu ne’e, tanba sei dependensia ekonomia ba sira nia la’en.
“Ami tau $1,000 ba transferensias publika atu SEPI bele hala’o knar hakbi’it ekonomia feto rural, tanba SEPI laiha transferensia publika,” Deputada Freitas hateten, iha Parlamentu Nasional.
Nudar deputada proponent, nia husu ba Sekretaria Estadu ba Promosaun Igualidade (SEPI) hanesan ezekutador atu bele difini mata dalan ida ne’ebe diak hodi hakbi’it duni ekonomia feto iha area rural, nune’e ema hotu bele hetan benefisiu husi osan ne’e.
Entretantu Deputadu Osorio Florindo, rekomenda ba SEPI nudar ezekutador, atu estabelese mata dalan ida ne’ebe klaru, nune’e osan ne’e benefisia duni ba grupo feto sira iha area rural.
“Osan ne’e tenke defini politika mata dalan ida atu labele ba deit grupo feto politiku sira, maibe hadia duni ekonomia feto rural nian,” Deputadu Florindo hateten.
Iha fatin hanesan Sekretaria Estado, Idelta Maria Rodrigues,fo agradese ba deputada proponent sira ne’ebe propoin ona $1,000 ba transferensias publika SEPI nian atu fo apoiu ba dezenvolvementu feto iha area rural.
Nia dehan, aliened ne’e osan $1,000 ne’e mos uja hodi prepara feto ba municipio, tanba feto presiza dezenvolve an no sei apoiu sosiedade sivil sira hodi halo edukasaun prevensaun ba violensia bazeia ba jeneru liu –liu violensia domestika.
“Ita laiha osan, ita depende deit ba UN, tanba ne’e ami hanoin katak ita presiza tau atensaun ba preparasaun feto iha municipio, tanba realidade ohin feto sira tur iha ne’e liu husi preparasaun ne’ebe diak,” nia hateten.
Tuir dadus SEPI nian hahu husi primeiru harii to’o 2013, iha grupo feto husi 13 distritus hamutuk 227 grupos mak benefisia ona husi orsamentu transferensia publika ne’ebe aloka ba SEPI kada tinan.
Nia rekonese katak husi numeru ne’e iha grupo balun mak konsege la’o ho susesu no iha grupo balun mos failha.
