Dirasaun Laboratorium Nasional Ministeriu Obras Publiku (LabNas MOP), dadaun ne’e falta transporte no ida ne’e impede servisu staf sira atu hala’o servisu iha baze.
Diretor LabNas, Saturnino Gomes, hateten dirasaun ne’e iha duni kareta rua, maibe ne’e la sufsiente, tanba staf sira halo servisu iha baze.
“Pur ezemplu projetu halo ponte iha kosta sul no leste ne’eba ne’e, bainhira ami atu ba, ami hadau malu fali kareta rua oan ne’ebe ami iha ne’e,” Diretor Gomes hateten, iha Mandarin, Dili.
Maske ida ne’e hanesan obstaklu ida ne’ebe dirasaun ne’e infrenta, maibe nia dehan, servisu iha baze kontinua la’o.
“Ami esforsu no buka maneira nafatin kumpri ami nia knar, kareta ida hau mak uja no ida ba operasional nian,” Diretor Gomes hateten.
Iha parte seluk Deputada Albina Marcal Freitas, hateten, papel laboratorium ne’e importante no ida ne’e kompetensia MOP nian atu tau atensaun.
“Kareta tenke iha, tanba sira nia servisu ne’e ba iha baze hodi hare obra ne’ebe la’o hela,” Deputada Freitas hateten.
Hatan ba kestaun ne’e Sekretariu Estadu Obras Publiku (SEOP), Luis Vaz Rodrigues, hateten Diretor Nasional Laboratorium tenke halo rekizasaun ba Ministeriu Obras Publiku liu husi derasaun servisu kooperativas.
“Para depois hatama iha diskusaun jeral iha nivel diretor nasionais, iha nivel diretores sira, hanesan buat ne’ebe sira iha no laiha tenke koalia, atu nune’e ministeriu bele kompleta sira nia preokupasaun,” SE Rodrigues hateten.
