Governu liu husi Sekretariu Estadu Eletrisidade agora dadaun hahu monta ona prepagu iha distritu, liu-liu iha distritu Baucau hahu instala ona.
“Ami komesa instala iha fatin-fatin,iha inisiu Dezembru 2013 hau ba iha ne’eba halo lansamentu metrus prepagu no uja SMS,” Sekretariu Estadu Eletrisidade (SEE), Januario Pereira hateten, iha Parlamentu Nasional.
Nia hateten, sistema monta prepagu sei kobre iha distritu hotu no komunidade sira sei ense pulsa, foin ahi lakan iha sira nia uma.
Entretantu Deputadu Felisberto Monteiro, apresia sitema ne’e tanba sistema ne’e diak bele fasilita lalais komunidade sira.
“Maibe tuir ami nia hare iha Dili laran deit monta prepagu lalos,” nia dehan.
Nia dehan, iha Dili laran deit kuaze 50% ema uja eletrisidade ho illegal, tanba sistema kontrola seidauk masimu.
Tanba ne’e nia husu ba SEE tenke hadia mekanismu estratejiku ne’ebe diak, atu bele kontrola ho diak.
Nia dehan, populasaun sira iha distritus bele ona atu selu eletrisidade, tanba sira mos iha osan.
“Tuir hau nia hare’e ita nia povu loron ida nia han dala tolu,ne’e hatudu katak sira iha duni responsabilidade,” Deputadu ne’e dehan.
Maske nune’e nia mos preokupa tanba ahi kontinua mate lakan iha distritu sira.
Iha fatin hanesan Deputadu Domingos Carvalho de Araujo, katak komunidade tenke selu atu nune’e fo retribuisaun ba estadu.
“Ita apoiu hanesan ne’e ba estadu, atu nune’e bele oferese enerjia nafatin ba ita ,” Deputadu de Araujo hateten.
Nia dehan, komunidade sira iha area rural bele selu maibe tenke limiti ba sira tanba sira loron ladun uja ahi.
“Ita hare araska teb-tebes ba sira atu buka osan hodi selu ahi, defisil oituan,” nia dehan.
Tanba ne’e nia sei hato’o ba feliais EDTL sira iha distritu para identifika ba kompania no restaurant sira para selu maibe ba komunidade sira tenke selu tuir amphere.
Tuir deputadu ne’e nia hare, katak iha suku Foho Lau, distritu Aileu prepagu monta hotu ona iha uma populasuan nian, maibe ahi seidauk tama.
“Ita hare’e katak iha ne’eba atu mai hola pulsa mos haraska tanba ETL do’ok husi fatin ne’eba,”
Tuir nia, suku refere transporte halai durante oras ida to’o oras rua nia laran mak foin to’o iha vila ,sa’tan ema la’o ain.
