Hafoin feriadu loron bo’ot Natal no Tinan Foun 2014, Sentru Rehabilitasaun Hiam Health (SRHH) hahu simu fali pasiente ho kazu malnutrisaun iha fulan Fevereiru ne’e, atu halo rehabilitasaun ba sira nia kondisaun saude.
Diretora organizasaun Hiam Health (HH), Rosalia da Cruz, hateten antes ne’e organizasaun kapasita uluk nia staf sira atu oinsa mak bele fo atendementu ne’ebe diak ba iha pasiente sira.
Nia dehan, sira mos halo sosializasaun informasaun ba fasilidae saude no komunidade sira kona ba servisu sentru nian inklui numeru kontaktu, sir abele kontaktu bainhira iha pasiente.
“Ami nia sentru loke fali iha fulan Fevereiru ne’e, simu fali pasiente malnutrisaun,” Diretora HH, da Cruz hateten, iha nia servisu fatin Aimutin, Dili.
Nia hateten, pasiente sei akompania husi nia familia sira hodi hela hotu iha sentru rehabilitasaun ne’e, sira sei tuir mos formasaun kapasitasaun kona ba oinsa prepara aihan ho nutrisaun, ijiene inklui mos kuda aihoris ne’ebe iha nutrisaun diak.
Durante ne’e, nia hatutan, iha ona familia barak mak tuir ona formasaun kapasitasuan kona ba asuntu ne’e, maibe barak mak la implementa ho diak.
“Bainhira ami ba fali halo monitorizasaun, familia barak mak la implementa buat ne’ebe sira aprende iha sentru rehabilitasaun, ho razaun laiha bee no rai,”Diretora da Cruz hateten.
Bazeia ba estatistika SRHH nian, katak iha tinan 2013 sira registu labarik sofre malnutrisaun hamutuk 245 mak hela iha sentru ne’e hodi rekopera sira nia kondisaun. Pasiente sira ne’e maioria husi distritu Aileu, Ermera inklui Dili.
Iha parte seluk, familia pasiente ne’ebe antes ne’e hela iha sentru, Amelia da Costa agradese ba organizasaun ne’ebe fo ona atendimentu ba sira nia oan hodi hetan rekoperasaun ba sira nia saude no kapasita ona sira oinsa atu prevene malnutrisaun iha uma laran.
“Durante ne’e ami iha uma la hatene oinsa atu tein aihan ne’ebe fo nutrisaun diak no ijiene ba ami nia oan,maibe bainhira ami hela iha ne’e ami aprende buat barak,” nia hateten.
