Grupu Feto Parlamentar Timor –Leste (GMPTL) konsidera Sekretaria Estadu ba Promosaun Igualidade faila hakbi’it ekonomia feto Timor-Leste, tanba realidade feto iha area rural barak mak sei moris iha vulneravel no sei depedensia ba mane. 
Prezidente GMPTL, Deputada Josefa Alvares Pereira Soares, hateten programa ne’e faila tanba fo subsidiu ba grupu sira ne’ebe hatama proposta, maibe la halo supervisaun ba implementasaun.
“Supervizaun ne’e importante tebes, se la’e ita abitua ema sira ne’e moris depedente ba subsidio, tinan –tinan nia lukru laiha, ne’e ladiak,” Prezidente GMPTL ne’e preokupa, iha Parlamentu Nasional.
Tanba ne’e, nia sujere ba SEPI atu halo selesaun didiak ba proposta no hases an husi sistema familiarismu, tanba realidade proposta barak mak la fo lukru diak ba feto sira, e iha mos grupu balun mak hetan lukru diak, hanesan fa’an dosi.
Hatan ba kestaun ne’e Serketaria Estadu ba Promosaun Igualidade (SEPI), Idelta Maria Rodrigues, rekonese sira la halo superviziona ba grupu balun, maibe servisu ida ne’e la’o kada semana.
“Ami iha dadus kompletu, ami iha 167 grupus iha 13 distritus mak asesu feto iha ekonomia, klaru balun balun la la’o, ne’e ami rekonese,”SE Rodrigues rekonese.
Nia haktuir, ema barak dehan SEPI la halo servisu tanba SEPI halo aktividade iha baze media sira nunka hatene tanba kuandu sai iha TV ema hotu hatete SEPI halao aktividade iha baze ida ne’e mak mentalidade ema nian.
Entretantu benefisiaria Adelina Freitas da Costa, hateten lukru ne’e depende ba grupu ida –idak nia kreatividade, labele focus deit ba iha suku maibe tenke halo mos atividade seluk hanesan aesoria, fa’an kios no seluk tan.
“Iha tinan 2008 ami hetan kedas apoiu husi SEPI ho montante (tiga ribuh dolar) atu tuir kapasitasaun espesifiku suku iha sentru formasaun SENAI,” nia dehan.
Koordenadora Grupu Inan Terus Nain ne’e mos haktuir, katak atividade ne’ebe grupu ne’e hala’o mak hanesan suku kazaku no vistidu ho tais, soru tais, asesoris no seluk tan.
