Ministru Administrasaun Estatal (MAE), Jorge da Conçeicão Teme, hateten tinan ida ne’e governu sei aloka orsamentu ho montante $1,000 kada fulan ba sukus iha sidade hodi mobiliza komunidade halo limpeza kada semana. 
Nia dehan, orsamentu ne’e sei transfere direitamente ba iha liders komunitaria sira, enkoraja komunidades liu –liu foinsa’e sira partisipa ativu liu tan iha atividade limpeza jeral, enkuantu governu fasilita deit kareta hodi tula foer.
Ministru Teme, rekonese katak meius ne’ebe durante ne’e uja la fo vantajen diak ba jestaun lixu, tanba orsamentu sentraliza iha ministeriu, avizu atu halo limpeza jeral maibe laiha aqua no ekipamentus ruma hodi supporta sira nia servisu.
“Osan ne’e la’os atu selu komunidades, maibe fo ba sukus atu mobiliza komunidade kada sukus liu –liu foinsa’e sira atu halo limpeza iha sukus laran,” nia dehan.
Nia informa, tinan ida ne’e sei hahu uluk iha distritu Dili no distritu seluk sei tuir mai, tanba problema lixu iha sidade laran grave tebes .
Iha parte seluk, Diretor Uniaun Joventude Haburas Ambiente (UJHA), Rui Manuel da Silva, hateten nudar jerasaun foun sira prontu atu kolabora ho governu hodi sosializa informasaun ba komunidade sira kona ba jestaun lixu ne’ebe diak.
Tuir nia, povu Timor –Leste presiza fo edukasaun ne’ebe klean kona ba impaktu husi soe lixu arbiru, komunidade tenke tau lixu iha fatin ne’ebe governu perapara ona iha kada bairo.
“Ami halo sosializasaun, seminar hodi hasa’e konsiensia komunidade nian kona ba hadomi ambiente no halo produsaun husi lixu ba pasta, binkai, kain pel no seluk hatudu ba publiku katak lixu mos bele fo benefisiu ba ita,” nia hateten.
Entertantu joventude Martinho Pinto, konkorda ho programa foun governu ne’e, tanba lixu iha sidade Dili grave liu ona.
“Hau hanoin sistema foun ne’e diak atu motiva komunidade sira hodi halo limpeza iha suku laran kada semana,” nia apoia.
