Doutor espesialista Timor oan ba moras kurasaun, Andre Monteiro, husu ba Ministerio Saude (MS) atu kompleta ekipamentus sala kardiologia, nune’e bele supporta servisu espesialista hodi fo atendementu ne’ebe diak ba pasientes kurasaun.
Tanba, tuir nia, laiha ekipamentus espesialista sira labele halo buat ida no pasientes kontinua halo transferensia ba rai liur atu hetan tratamentu ne’ebe diak liu.
Nia dehan, ekipamentus iha Ospital Nasional Guido Valadares (HNGV),iha sala kardiologia sei minimu tebes inklui espesialista ba moras jantung mos sei minimu.
“Kuandu espesialista kurasaun iha ona no ekipamentus mos kompleta, ita la presiza transfere pasiente ba rai lliur, kecuali buat balun ne’ebe ita labele halo iha ne’e,” nia dehan.
Entretantu, Diretor Jeral Interino HNGV, Francisco Pereira do Rego, sente orgulho, tanba Timor –Leste iha ona espesialista ba area kardiologia no promete sei esforsu kompleta ekipamentus no medikamentus ne’ebe sei falta.
“Hau koalia ona ho sira, atu sira bele fo ona lista ekipamentus saida mak sira hakarak atu ita bele propoin ba orsamentu jeral do estadu 2014,” DJ Interino, do Rego hateten.
Ho prezensa medikus espesialista Timor oan ne’e, nia dehan, diresaun ospital rekomenda ona ba iha MS atu limite kontratu ho medikus estranjeirus.
“Itabele minimize kontratu ne’ebe ita halo medikus husi Philipina, fulan neen remata, it abele husik,” nia dehan.
Entretantu Ministerio Saude, Sergio da Costa Lobo, hateten MS iha ona planu atu estabelese Sentru Kardiologia no Traumatologia iha HNGV hodi redus numeru transferensia moras no poupa osan ba ema hotu.
