Membru Parlamentu Nasional kestiona maka’as kona ba funsionamentu makina atu halo Bilete Identidade ne’ebe durante ne’e at no husu ba Ministeriu Justisa atu fo atensaun lalais ba kestaun ne’e.
Deputada Josefa Alvares Pereira Soares, hateten makina ne’e at tinan ida ona no komunidade barak mak to’o agora laiha dokumentus Bilete Identidade (BI) ne’e.
Tanba ne’e nia dehan, iha tinan 2014 ne’e Ministeriu Justisa iha duni nesesidade atu halo manutensaun ba makina ne’e.
Deputada ne’e hatutan, BI ne’e dokumentus ne’ebe importante tebes no nudar sidadadun Timor-Leste, iha duni dever atu trata no hetan dokumentu ne’e.
“Nune’e bele hatene moris fatin, moris sa tinan, ne’e importante tebes, no ba ne’ebe deit sente seguru no laiha failansu,” nia dehan.
Hatan ba kestaun ne’e, Ministru Justisa, Dionisio Babo Soares, hateten atu hadia sistema BI no atu hadia makina sira ne’e, agora dadaun tama ona iha planu orsamentu 2014 nian.
Nia rekonese, katak komunidade barak mak seidauk iha BI, tanba ne’e hakarak ga lakohi tinan ne’e tenke reativa fali BI.
“Ami sei reativa fila fali Bilete Identidade foun, iha tinan ne’e,” nia dehan.
Iha parte seluk komunidade Nino Belo, hateten dokumentus hanesan BI no Kartaun Eleitoral no dokumentus seluk ne’e importante tebes ba sidadaun hotu atu trata, maibe ho durante ne’e makina at.
“Governu presija halo sosializasaun kona ba saida mak BI ne’e,” nia sujere.
