Embaixada Amerika iha Timor-Leste apoia $260 mil ba konstrusaun portu permanente Polisia Maritima (POLTIMA), nune’e bele fasilita servisu unidade ida ne’e ho diak liu tan iha future.
Komandante Polisia Maritima, Superintendente Lino Saldanha, hateten antes ne’e Komandante POLTIMA ho Komandante Jeral Polisia Nasional Timor-Leste (PNTL) halo lobi uluk ho embaixada.
“Portu ne’e lolos remata iha Dezembru 2013, maibe tanba failansu oituan,” Komandante Saldanha hateten, iha Kaikoli, Dili.
Tuir planu nia dehan, portu ne’e sei halo inagurasaun iha fulan Janeiru 2014, no material ne’ebe uja ba ne’e mai husi Australia, atraza oituan tanba liu husi Singapura.
Nia mos informa, kona ba obra ne’e halo husi forsa Amerika sira ne’ebe sira hanaran Amerika Under Construction Team 2.
Iha parte seluk membru Komisaun B (seguransa, defeza, negosiu estrnjeiru), Deputadu Cesar Valente de Jesus, apresia kooperasaun servisu entre PNTL ho Embaixada Amerika iha Timor-Leste.
“Portu ne’e atu fasilita servisu Polisia Maritima sira,” Deputadu de Jesus dehan.
Deputadu ne’e dehan, ho portu ne’e sira bele kaptura peskas illegal no atu repara sira nia roo ne’ebe balun at no soe hela.
