Tuir observasaun membru Parlamentu Nasional nian durante tinan ida iha governasaun V Governu Konstitusional, nota katak setor edukasaun la’o fali ba kotuk, kompara ho governasaun governu antes.
Deputadu Aurelio Freitas Ribeiro, hateten programa merenda eskolar, orsamentu aloka tiha ona durante tinan ida nian, maibe nia implementasaun loron 44 deit.
“Jestaun mak la diak duni ,tanba ne’e mak buat ne’ebe ita planeia tiha, ita la konsege ezekuta ho lolos,” Deputadu Ribeiro hateten, iha Parlamentu Nasional.
Nia hatutan, volume ezekusaun orsamentu jeral do estadu husi Ministeriu Edukasaun (ME) menus liu.
Alem de ne’e, Deputadu husi bankada Fretilin ne’e mos preokupa kona ba formasaun profesores sira durante fulan tolu, husi distritu mai iha Dili ne’ebe nia kustu alojamentu bo’ot tebes.
“Hau duvida gastus ho benefisiu sei laiha balansu ida,” nia preokupa.
Tanba ne’e nia sujere ba ME atu halo planu ne’ebe mak klaru, atu nune’e bele rezolve problema iha setor edukasaun, se la’e fakar osan deit.
Entretantu membru Komisaun F (edukasaun, saude, veteranus, kultura no igualidade Jeneru), Deputada Bendita Moniz Magno, hateten problema edukasaun presiza duni resolve, maibe pasu pur pasu.
”La’os halo milagre, ohin tenke rezolve hotu problema ne’ebe mak ita infrenta. It abele hare eskola barak mak sei falta meja no kadeiras,” nia dehan.
Tuir nia, problemas iha setor edukasaun nunka bele resolve, tanba sistema mak ladiak.
Kona ba programa merenda eskolar ne’ebe la’o ladun diak, nia dehan, tanba aprova orsamentu jeral 2013 nian mak tarde.
“Agora tama ba 2014 ona, sira tenke hare vantajen no disvantajen husi programa ne’e durante tinan 2013,” Deputada ne’e dehan.
Nia mos husu ba ME tenke hadia problema sira ne’ebe mak durante ne’e eskolas infrenta liu-liu ba problema infrastrutura no kurikulu ensino ninian.
Antes ne’e Vise Ministra Ensino Baziku, Dulce de Jesus Soares, bainhira hala’o sorumutu ho Diretor da Eskola Ensino Baziku husi distritu 13, husu ba diretor sira tenke servisu maka’as hodi rezolve problemas ne’ebe iha.
“Dala barak ema kritika ita, maibe kritika ne’e konstrutivu oinsa mak ita bele hadia diak liu tan,” Vise Ministra Soares dehan.
