Kazu droga ne’ebe Polisia Servisu Investigasaun Kriminal konsege kaptura bainhira halo operasaun iha Dili laran, kazu tolu mak hetan ona desizaun final iha tribunal, enkuantu rua seluk sei iha prosesu investigasaun.
Xefe Servisu Investigasaun Kriminal (SIK), Superintendente Calisto Gonzaga, hateten iha tinan 2012, kazu droga iha rua no 2013 iha kazu tolu, no arguidu sira hetan ona sentensa.
“Balun tinan neen no balun tinan walu,” Xefe Gonzaga hateten, iha Kaikoli, Dili.
Tuir nia, kazu sira ne’e ho tipu oin-oin balun sira lori mai iha Timor-Leste no balun sira uja nasaun Timor-Leste sai hanesan fatin tranferensia atu lori ba Indonezia.
Nia dehan, operasaun ba kazu droga kontinua la’o, polisia intelejensia lor-loron hala’o sira nia knar atu rona nafatin informasaun, karik iha ema balun koko hatama droga mai iha nasaun ida ne’e.
Entretantu Deputada Bendita Moniz Magno, apresia tebes ho servisu Polisia SIK nian hodi identifika suspeitu sira ne’ebe hatama droga mai iha rai laran.
“Polisia tenke kaptura no konsege duni aselera duni prosesa, nune’e ema hotu bele kumpri sira nia sala,” Deputada Magno dehan.
Nia mos husu ba SIK, tenke halo investigasaun didiak, tanba droga ne’e fasil tama iha rai laran, tanba ho investiga mak bele sukit nia hun, mai husi ne’ebe?.
