Ministru Agrikultura e Peskas (MAP), Mariano Asanami Sabino, hateten numeru malnutrisaun iha rai laran kontinua as, tanba konesementu familia kona ba variadade aihan ne’ebe fo nutrisaun ba saude menus. 
Nia dehan, kauza husi malnutrisaun iha fator barak, maibe liga ho situasaun Timor –Leste kauza principal mak pratika aihan iha uma kain ladun diak, barak liu mak depende ba fos deit.
Tanba ne’e, nia hatutan, tinan ida ne’e sei dezenvolve programa kantreiru familia, komunidade no eskolas, no intensaun atu eduka labarik no familia sira oinsa konsume aihan ne’ebe fo nutrisaun diak.
“Ba future, ita hanoin kanteiru sira tenke iha, se mak iha kanteiru ami fahe fini marungi oan no modo, kuda iha uma sorin tanba nutrisaun ne’e han oi-oin,” Ministru Asanami hateten, iha nia fatin, Comoro, Dili.
Entretantu Ministru Saude, Sergio da Costa Lobo, rekonese katak kazu malnutrisaun sei as iha rai laran, tanba konesementu familia kona ba nutrisaun menus no konsidera aihan sira ne’ebe fo nutrisaun ba saude hanesan aihan luluik tuir kultura.
“Edukasaun kona ba hahan, ekonomiku, cultural, ambiental no saneamentu sei menus,” Ministru Lobo hateten.
Nia dehan, bazeia ba dadus demography health survey 2010, numeru malnutrisaun iha Timor –Leste hamutuk 58% labarik badak, 19 % krekas no 45% todan menus e afeta liu ba labarik idade tinan lima mai kraik no inan fo susu sira.
Tanba ne’e Ministerio Saude no Ministeriu Agrikultura sei nafatin halo kampania liu husi programa promosaun demonstrasaun aihan local hodi hasa’e konesementu komunidade sira nian.
“Liu –liu aihan sira ne’ebe fo nutrisaun diak ba saude labarik, tanba malnutrisaun fo perigu ba futuru labarik nian,” nia hateten.
Entretantu Komunidade Comoro, Jeferino da Silva, hateten seguransa aihan no nutrisaun sei sai dezafiu bo’ot iha Timor –Leste tanba produsaun sei ki’ik presu aihan local sei as no konesementu komunidade kona ba nutrisaun limitadu.
“Uma kain ka individu iha area rural tenke iha konesementu kona ba importansia nutrisaun atu sira bele prevene ho konesementu ne’ebe sufsiente bele ajuda sira diversifika sira nia konsumu hahan ne’ebe iha kualidade duke kuantidade deit,”nia dehan.
Nia hatutan, atu redus numeru malnutrisaun pasu importante ida mak dezenvolve diak liu tan setor peskas no pekuaria, tanba setor rua ne’e nia papel importante tebes atu redus malnutrisaun iha rai laran.
