Ponte Taroman iha distritu Suai ne’ebe hahu rehabilita iha 2010 to’o agora seidauk remata no dadaun ne’e obra ne’e paradu hela.
Deputadu Manuel Castro, hateten orsamentu ne’ebe aloka ba iha obra ne’e ho montante bo’ot, maibe realidade seidauk finalize.
“Agora servisu paradu hela, semente ne’ebe sira fui ona desde fulan Abril 2013, to’o ohin loron laiha, mohu tiha ona,” Deputadu Castro kestiona, iha Parlamentu Nasional.
Tanba ne’e nia husu ba governu atu bolu atensaun ba kompania ne’ebe kaer obra ne’e, hodi finalize lalais projetu ne’e.
Hatan ba preokupasaun ne’e Sekretariu Estadu Obras Publiku (SEOP), Luis Vas Rodrigues, katak ponte ne’e atrazu tanba sei hein material ne’ebe to’o oras ne’e dadaun seidauk mai.
“Agora dadaun sei hein hela besi ida tan para tau iha klaran ne’e,” SE Rodrigues dehan.
Kona ba kompania, nia dehan, governu bolu ona atensaun ba sira no kompania nain promote sei finalize obra ne’e iha tinan ne’e (2014).
“Ita sei fo tempu ba sira hodi nune’e sira bele kompleta to’o Marsu 2014 sira bele remata ona obra ne’e,” SE Rodrigues hateten.
Nia dehan orsamentu ne’ebe hasai ba halo obra ne’e hamutuk $3 mil resin no pagamentu ba kompania ne’e la’o hela, pagamentu fo osan rohan.
“Ita selu hela, maibe kompania ne’e nia kaer projetu barak liu, entaun nia labele jere osan projetu ne’e ho diak,” nia dehan.
