Diretor Nasional Apoia Hospitalar no Enkaminamentu Ministeriu Saude (MS), Horacio Sarmento, hateten stok aimoruk iha Servisu Autonomo Medikamentus no Ekipamentu de Saude sei sufsiente atu fo atendementu ba komunidade sira to’o iha fulan Marsu tinan 2014. 
Nia dehan, foin lalais ne’e iha aimoruk kontainer 15 mak tama husi portu no iha tan trek lima mak tama husi Kupang no oras ne’e dadaun iha ona ekipa de avaliasaun, MS halo hela inspesaun tuir kualifikasaun no espesifikasaun ne’ebe ministeriu husu.
“Aimoruk balun nia kuantidade ladun barak, maibe ami perkirakan bele to’o iha fulan Marcu tinan 2014,” Diretor Sarmento dehan, iha Dili.
Nia hatutan, aimoruk sira ne’ebe Kompania Kimia Farma hatama mai ne’e kuaze items aimoruk ne’ebe iha lista esensial, maibe iha items balun hanesan anastesia no konsumaveis, MS kontratu ho kompania local balun atu hatama.
“Tanba Kimia Farma nia presu bo’ot liu kompara ho kompania local,” nia dehan.
Iha parte seluk, Xefe Interino Sentru Saude sub-distritu Atauro, Januario Cabessa Soares, rekonese katak iha fulan hirak liu ba iha duni items aimoruk balun mak menus, maibe oras ne’e dadaun stok aimoruk sufsiente.
“Kuandu iha items balun ne’ebe menus, ami halo pedidu rekizasaun ba saude distritu Dili hodi submete ba SAMES atu hatama aimoruk,” Cabessa dehan.
Nia hatutan, moras ne’ebe registu as iha Sentru Saude sub-distritu Atauro mak moras Infeksaun respiratorio (ISPA) no moras sira seluk.
