Ministeriu Saude husu responsabilidade Servisu Autonomo Medikamentus no Ekipamentus da Saude (SAMES) kona ba fakar no sunu aimoruk kareta isin walu iha Tibar, tanba liu prazu.
Diretor Nasional Servisu Apoia Hospitalaria no Enkaminamentu Saude, Horacio Sarmento, hateten Ministerio Saude (MS) hetan duni konvite atu marka prezensa iha serimonia fakar aimoruk ne’e, maibe parte ministerio la marka prezensa, tanba informasaun la klaru.
SAMES fakar aimoruk iha Tibar, iha dia 15 Novembru 2013 no aimoruk kareta isin walu destroy tanba labele uja ona.
“Ami laiha liu informasaun kona ba SAMES sunu ne’e aimoruk ne’e, ami simu konvite duni atu partisipa maibe iha konvite ne’e la lampirkan ho lista items saida mak sunu no orsamentu hira,” Diretor Sarmento dehan, iha Kaikoli,Dili.
Ho kestaun ne’e nia dehan, MS deskontente ho servisu SAMES nian, tanba tuir lolos aimoruk sira ne’ebe iha tenke destribui hotu tantu husi doadores no sosa ho orsamentu estadu nian.
Entretantu membru Komisaun F Parlamentar (saude, edukasaun, igualidade, veteranus), Deputada Ilda Maria da Conceicão lamentavel ho servisu saude nian, tanba iha fasilidades saude povu mak hasai osan hodi sosa aimoruk,maibe ba fakar ne’e iha.
Nia dehan, bainhira Komisaun F halo fiskalizasaun ba SAMES fulan kotuk, iha duni informasaun sei sunu tan aimoruk lubuk ida, tanba liu prazu.
“La fo klaru, sira dehan deit la kleur tan sei sunu tan aimoruk sira ne’e, tanba labele uja ona,” Deputada ne’e dehan.
Nia mos husu ba Ministeriu Saude ho SAMES atu labele dun malu, tenke buka resolve problema ne’e, tanba kondisaun armagen mos la favorese ona atu tau aimoruk.
“Uma kakuluk kuak, udan been tama no fo impaktu aimoruk sira ne’e sosa mai ba sunu deit, enkuantu povu kontinua halerik ba aimoruk,” nia dehan.
Enkuantu bainhira TDW koko konfirma asuntu ne’e ba iha Diretora SAMES, doutora Odete Maria Feritas Belo, maibe lakonsege tanba okupadu.
