Membru Parlamentu Nasional husi Komisaun F (saude, edukasuan, igualidade no veteranus) konsidera atendementu Ministeriu Saude ba pesoal saude sira la justu, iha tendensia diskriminasaun intermus de fasilidade no kondisoens.
Prezidente Komisaun F, Deputadu Virgilio da Costa Hornai, hateten situasaun sira ne’e mosu bainhira politika Ministeriu Saude nian atu destaka medikus, enfermeirus no parteiras iha sukus ne’ebe la kompleta ho fasilidades.
“Tratamentu ba deit mediku sira formadu husi Cuba, diskriminasaun ba tratamentu fasilidade no alojamentu no komunikasaun,” Prezidente Komisaun F, Deputadu Hornai kestiona, iha Parlamentu Nasional.
Lolos ne’e nia dehan, Ministeriu Saude tenke fo tratamentu igual ba pesoal saude hotu.
Tuir nia, ajente profesional saude mak emfermeirus, parteiras no medikus atendimentu tenke igual bainhira parte ida la satisfas konserteza iha implikasaun mos ba atendimentu saude publiku tanba emfermeirus no parteiras mak durante ne’e fo atendimentu ba povu iha baze.
Alem de fasilidade no kondisaun emfermeirus no parteira sira mos kestiaona kona ba kapasitasaun tanba emfermeirus sira ne’ebe antigun barak mak seidauk hetan oportunidade atu hasa’e sira nia kuinesementu ba area ne’ebe sira servisu ba.
Hatan ba kestaun ne’e Ministru Saude, Sergio da Costa Lobo rejeita kestaun ida ne’e tanba fasilidade liu –liu transporte ne’ebe Ministerio Saude distribui ne’e ba pesoal saude hotu ne’ebe servisu iha fasilidade saude uza hodi fo atendimentu ba komunidade liu –liu halo vizita domisiliario.
“Motor sira ne’e la’os ba medikus sira deit maibe ba ekipa ne’ebe servisu iha postu saude sira kada suku atu halo vizita domisiliario ba komunidade sira,” dehan Ministru Lobo.
