Instituisaun Provedoria dos Direitus Humanus e Justisa (PDHJ) Timor-Leste entrega ona dadus labarik hirak ne’ebe lakon iha okupasaun Indonezia ba KOMNAS HAM Indonezia hodi identifika.
Reprezentante PDHJ, Valerio Ximenes, hateten dadus hirak ne’e entrega bainhira PDHJ halo sorumutu ho Komisaun Nasional ba Direitus Humanus (KOMNAS HAM), iha fulan Outubru 2013 iha edifisiu PDHJ.
Nia dehan, agora dadaun ekipa KOMNAS HAM hala’o ona vizita ba iha fatin sira hanesan iha Jogjakarta, liu –liu panti asuhan sira.
“Iha dadus ne’e ami entrega labarik nain 18 nia naran ba iha KOMNAS HAM Indonezia, maibe to’o agora seidauk identifika, sira so vizita deit fatin iha Jogjakarta,” nia dehan.
Nia hatutan, katak dadus sira ne’e PDHJ rekolha liu husi xefe sukus sira no familia sira ne’ebe oan lakon iha tempu okupasaun Indonezia.
Momerandum of Understanding (MoU) ne’ebe asina husi PDHJ ho KOMNAS HAM iha fulan Maio 2013 iha Bali, nia dehan, ho intensaun oinsa sira bele apoia PDHJ ba asuntu ema lakon nian, tanba governu Indonesia ladun simu KOMNAS HAM atu hola parte iha prosesu enkontru entre governu.
Iha parte seluk, Vitor da Costa ne’ebe hola parte mos iha ekipa ida ne’e, halo mos aproximasaun ho Militar Indonezia (TNI) no lideransa sira seluk hodi buka tuir Timor oan sira ne’ebe lakon.
“Komisaun ne’e foin hahu nia servisu iha dia 17 fulan Novembru 2013 ne’e, ami konsege identifika ona labarik ida iha Jogja ne’ebe lori iha 1988, ida naran Mariano lori iha 1992 ne’ebe agora la hatene nia familia, ida seluk mos ami identifika iha Malang,” Vitor dehan.
Nia hatutan, katak ekipa ne’e la’os atu ba verifika no identifika deit ema sira ne’e, maibe ekipa ne’e iha mos medikus psikologia nian atu fo atendementu ba ema sira ne’e, tanba balun iha problema ho mental mos.
