Ministeriu Justisa iha ona planu atu fo treinamentu fisiku ba guarda prizaun Becora hodi hasa’e sira nia kapasitasaun.
Vise Ministru Justisa, Ivo Valente hateten, tinan kotuk iha guarda prizaun nain 15 ba tuir treinamentu iha Adelaide-Australia.
“No iha tinan oin mai ita sei delega tan balun atu tuir tan treinamentu fisiku iha rai laran ho Falintil-Forsa Defeza Timor-Leste sira,” Vise Valente dehan, iha Dili.
Tanba tuir nia, wainhira hakarak guarda prizaun sira atu professional, governu presiza iha responsabilidade atu hasa’e sira nia kapasitasaun iha sira idak-idak nia area.
“Ami mos sei fo treinamentu teoria, hanesan kona ba lei sira, aprende direitus humanus, oinsa trata prizioneiru sira,” Vise Ministru Justisa ne’e dehan.
Nia dehan, mesmu sira balun hetan ona treinamentu barak-barak, maibe tanba sira nia servisu ne’e integradu kedas ho ema, entaun presiza nafatin atu fo treinamentu, liu-liu oinsa atu kaer ema.
Tuir nia, treinamentu ne’e importante atu evita prizioneirus halai husi prizasaun hanesan akontese iha tinan 2006 no iha fulan Novembru, dia 03 2013 foin lalais ne’e.
Iha fatin seluk Deputadu Mateus de Jesus, apoia tebes inisiativa ida ne’e no importante tebes, atu nune’e bele halo seguransa ho professional liu tan.
“Atu prevene ema ho fasil halai husi prizaun, kestaun ida maka oinsa guarde prizaun sira bele trata ema, no wainhira prizioneiru ida atu halai sai, asaun fiziku saida maka sira tenke foti, buat sira ne’e tenke liu husi treinamentu,” Deputadu de Jesus dehan.
Nia dehan, prizioneiru sira bele halai ho fasil, tanba sira hatene frakeza guarda prizioneirus nian.
