Organizasaun Fundasaun Mahein konsidera alokasaun orsamentu balun iha area defeza no seguransa la realistiku, tanba ne’e sira hasoru malu ho komisaun B Parlamentu Nasional hodi koalia kona ba Orsamentu Jeral Estadu 2014 ba area rua ne’e nian.
Diretor Ezekutivu Fundasaun Mahein (FM), Nelson Belo, hateten objetivu enkontru ne’e mak atu informa ba iha Komisaun B, katak alokasaun orsamentu ba iha area defeza no seguransa ladun realistiku.
“Ami hato’o ba sira para sira halo diskusaun no seluk fali mos manutensaun ba ekipamentus viatura sira ne’ebe mak durante ne’e laiha serteza ne’ebe mak diak,” Diretor Belo dehan, iha Parlamentu Nasional.
Preokupasaun seluk ne’ebe sira hato’o ba iha Komisaun B mak kona ba alokasaun orsamentu sosa viaturas no sosa kilat.
“Ami aprezenta ba Komisaun B atu fortifika sirania hanoin para lori ba plenaria hodi debate Orsamentu Jeral do Estadu tinan ida ne’e,”Belo dehan.
Total Orsamentu Jeral do Estadu (OJE) 2014 nian hamutuk $1,5 bilioens no aloka ba Ministeriu Defeza no Seguransa $75,127 milioens.
Alokasaun tuir rubrika orsamentu ba Ministeriu Defeza no Seguransa nian mak transferensia $3 milioens,kapital minor $4,976 milioens,kapital dezenvolvementu $350 milioens ,salariu no vensimentu $25 milioens,bens servisu $33,951 milioens.
Orsamentu ba Polisia Nasional Timor-Leste (PNTL) $27 milioens no ba Sekertariu Estadu Seguransa (SES) $600 milioens no ba Instituisaun Falintil-Forsa Defeza de Timor-Leste (F-FDTL) $21 milioens no ba Sekertariu Estadu Defeza (SED) $3 milioens no ba gabinete Ministeriu Defeza no Seguransa $2 milioens.
“Ami husu ba parlamentu atu bele fortifika alokasaun orsamentu ba Polisia Komunitaria ne’ebe mak durante ne’e harii ona iha distritu Aileu,Maliana,Baucau,Liquisa no mos ihadistritu Viqueque,” Belo sujere.
Maske nia ladun dekor numeru osan maibe tuir sira nia analiza, alokasaun OJE 2014 ba area rua ne’e tun kompara tinan 2013 nian.
Entretantu membru Komisaun B (defeza, seguransa nasionais no negosiu estranjeiru), Deputadu David Dias Ximenes, hateten FM nudar observador ba are defeza no seguransa nian, sira aprezenta buat barak ba Komisaun B .
“Hau labele adianta buat ruma, ami kombina tiha ona katak sira sei fo sai sira nia relatoriu,” Deputadu Ximenes dehan.
Tuir informasaun ne’ebe mak FM fo ba Komisaun B mak instituisaun balun uja material estadu nian hodi hala’o kasa ilegal.
Tanba ne’e nia husu ba insituisaun ne’ebe mak utiliza material estadu nian tenke hapara kasa, atu nune’e animal fuik sira iha ai laran labele mohu.
Deputadu ne’e mos seidauk hatene lolos kona ba kasa ne’e husi Instituisaun F-FDTL ka PNTL.
“Kasa ne’e lolos proevi, porque ema nia rai seluk proevi ona so Timor mak sei kasa nafatin,” nia dehan.
Iha sorin seluk Prezidente Komisaun A, Deputada Carmelita Caetano Moniz, husu ba sosiedade sivil atu labele hakilar deit, tanba lei iha atu prosesa.
“Hau hatene muito bem, katak sira mos halo kontrolu sosial ba rai ida ne’e ba instituisaun hotu-hotu sira mos hatene kona ba prosesu lei,” nia hateten.
