Organizasaun Judicial System Monitoring Program sujere atu tau CCTV iha tribunal distrital sira, nune’e bele akapta situasaun saida deit maka akontese iha tribunal.
Diretor Ezekutivu Judicial System Monitoring Program (JSMP), Luis de Oliveira Sampaio, hateten seguransa iha tribunal ne’e importante tebes, tanba ne’e presiza tau CCTV iha tribunal no fatin jurisdisaun sira seluk.
“Ita hare iha jurisdisaun hotu-hotu seidauk monta CCTV hodi kontrola seguransa iha tribunal no Ministeriu Publiku,” Diretor JSMP, Sampaio dehan, iha nia knar fatin, Colmera, Dili.
Intensaun atu tau CCTV iha tribunal mak, nia dehan, karik iha tribunal akontese asidente ruma, seguransa sira bele hare.
“Hanesan na’ok ten keta tama no karik akontese tuku malu iha tribunal, CCTV ne’e bele sai hanesan mos faktus atu hatene lia los,” nia dehan.
Entretantu Juis Administrador Tribunal Distrital Dili, Duarte Tilman, konkorda ho sujestaun ida ne’e no nesesidade duni monta CCTV iha tribunal no fatin judicial sira seluk.
“Tanba ne’e karik atu halo aprezentasaun orsamentu ba 2014, bele mos kestiona kona ba ida ne’e,” Juis Tilman hateten.
Kona ba kazu pratika, nia husu ba polisia nain tolu atu permanente iha Tribunal Distrital Dili.
“Mais presiza duni CCTV para bele hare pelumenus visitantes sira ne’ebe ba ne’e balun lori sasan kroat atu halo problema, karik labele resolve problema iha liur bele lori tama to’o iha tribunal, ” Juis Administrador TDD ne’e dehan.
