Adjuntu Komisaun Anti Korupsaun, Komisariu Manuel Bucar, hateten papel media importante tebes ba servisu Komissun Anti Korupsaun ninian, media mak sai liman ba KAK hodi informa buat ne’ebe mak la’o la los.
“Ita bo’ot sira mak liman KAK ninian,se ita bo’ot sira mak la hanesan liman KAK ninian, todan teb-tebes,” Komisariu Bucar hateten, iha treinamentu Jornalista sira kona ba reportage media ba direitus humanus, iha edifisiu TLMDC, Hudi Laran, Dili.
Bucar hatutan, papel media importante tebes ba Komisaun Anti Korupsaun (KAK) hodi hala’o nia servisu diak liutan, tanba rekursu humanus KAK ninian hamutuk staf 60 deit.
“Ita bo’ot sira hanesan Media Televisaun,Media Elektronika hanesan Radio importante tebe-tebes bele informa buat sira ne’ebe la los mai para KAK sai hanesan referensia ida atu KAK utiliza fali halo verifikasaun ,”Adjunto KAK ne’e dehan.
Total kazu 2012 nian ne’ebe mak KAK investiga ona hamutuk 100 resin no kazu 2013 ninian besik 100, maibe to’o agora seidauk halo rekapitulasaun.
Husi kazu hirak ne’e, barak liu mak abuzu de poder no pekulatu (uja sasan estadu nian hodi hala’o ba interese privadu ninian) inklui korupsaun pasiva ba aktu ne’ebe mak kontra lei (simu sasan).
“Kuandu hakarak ita nia komunidade bele moris diak, liu husi orsamentu ne’ebe kada tinan Parlamentu aprova, osan ne’e tenke ba duni povu nia moris,” nia dehan.
Entretantu ativista direitus humanus, Jose Luis Oliveira, dehan atu garante ema hotu nia moris diak no hakmatek, mai husi estadu nia ajente sira.
Koalia kona ba direitus humanus, nia dehan, ema hotu iha direitu hanesan.
