Iha grupu feto hamutuk 60 (husi 13 distritus) mak partisipa iha feira fiar, ne’ebe organiza husi Sekretaria Estadu ba Promosaun Igualidade hodi promove sira nia produtu local ne’ebe feto sira halo rasik.
Sekretaria Estadu Idelta Maria Rodrigues, hateten atividade ne’e relasiona ho selebrasaun loron nasional feto Timor –Leste ne’ebe monu iha dia 03 fulan Novembru, ba tinan ida ne’e selebra ba dala 36.
Nia dehan, feira fiar ne’e ho objetivu atu halo promosaun ba produtu local ne’ebe mak feto sira halo, hatudu ba ema seluk katak feto la’os halo deit servisu uma laran, maibe bele halo buat ruma hodi hasa’e rendimentu familia.
Alem de ne’e nia dehan, atividade feira ne’e mos bele sai motivasaun ida ba grupu feto sira hodi hasa’e sira nia kuantidade produsaun, tenke hanoin atu halo produsaun ida ba ema seluk atu sosa, la’os ba an rasik.
“Hau espera katak ho atividade ida ne’e ita hotu la haluhan katak feto la’os iha uma laran deit, maibe sira mos bele halo buat ruma hadia sira nia moris sustenta ekonomia familia sira nian no oinsa ita hamutuk hateten la’e ba violensia domestika, tanba violensia domestika bele hamate ekonomia familia no dezenvolvementu familia,” SE Rodrigues hateten.
Nia dehan, feira fiar ne’e hahu kedas iha IV governu konstitusional bainhira selebra loron internasional feto rural, ho objetivu atu promove produsaun ne’ebe feto sira halo ba ema seluk iha nasional no internasional.
Entretantu, Koordenadora Grupu Buka Rasik husi distritu Viqueque, Candida Gusmão agradese ba governu ne’ebe fo ona atensaun no enkoraja sira atu hola parte iha prosesu dezenvolvementu rai ida ne’e.
Nia hatutan, katak feira ne’e importante tebes ba grupu feto sira husi 13 distritus atu konese malu diak liu tan.
“Feira ne’e diak tanba liu husi atividade ida ne’e ami grupo feto sira husi 13 distritu ami bele hasoru malu no konese malu diak liu tan no fahe hanoin no esperiensai ba malu,” nia hateten.
Iha oportunidade ne’e nia hato’o parabens ba feto Timor –Leste tomak no husu atu partisipa ativu tan iha kualker atividade ne’ebe governu sira realize iha nivel nasional no distrital ho matenek no kreatividade ne’ebe feto sira iha.
Iha fatin hanesan Koordenadora Grupu Inan Terus, Adelina Freitas da Costa, sente kontente, tanba bele hola parte iha selebrasaun loron nasional ba feto iha tinan ida ne’e, maibe sente triste tanba ema barak mak la fo importansia ba produsaun feto sira nian iha feira ne’e.
“Hau kontente tebes tanba loron ida ne’e loron nasional ba ita feto sira, maibe hau triste tanba laiha konsumidores vizita ami nia baraka,” nia dehan ho triste.
