Atu atende projetu emergensia iha distritu lima ne’e hamutuk projetu 152, Ministeriu Obras Publiku (MOP) husu tan $74,448,748,11 ba iha Parlamentu Nasional atu aprova lalais, nune’e bele hala’o projetu hirak ne’e.
Sekretariu Estadu Obras Publiku (SEOP), Luis Vaz Rodrigues, hateten projetu emergensia hirak ne’e, mak hanesan estradas no pontes ne’ebe at tanba dezastre naturais ne’ebe akontese foin lalais ne’e iha distritu lima.
Distritu lima ne’e mak hanesan distritu Covalima, Manufahi, Ainaro, Manatuto no distritu Viqueque.
“Tenke atinji duni $74,448,748.11, tanba pontu projetu ne’ebe at ne’e hamutuk 152, kada pontu sei aloka $489,794.40,” SE Rodrigues dehan, iha Mandarin, Dili.
Nia rekonese, katak ne’e osan bo’ot duni, maibe ne’e bazea ba kalkulasaun ne’ebe ministeriu halo ona, hodi oinsa mak bele resolve projetu emergensia.
“Relatoriu fiskalizasaun ba projetu emergensia ami defende tiha ona iha Konselhu Ministru no sei hatama iha Parlamentu Nasional,” SE Rodrigues hateten.
Iha parte seluk Prezidente Komisaun E (infra-estrutura, transporte, komunikasaun), Deputadu Pedro da Costa, hateten lista orsamentu ne’e komisaun hetan ona, maibe sei presiza hare didiak, antes aprova.
“Dezenvolvementu ne’ebe ita hakarak halo ne’e, dezenvolvementu ne’ebe orientadu no fazeadu, ” Prezidente Komisaun E ne’e dehan.
Maibe nia dehan, orsamentu ne’e tenke bazea ba planu orsamentu jeral, labele halo buat hotu-hotu tenke emergensia.
“Ita bele diskuti iha debate orsamentu jeral,” nia dehan.
