Membru Parlamentu Nasional ne’ebe mos nuda membru Grupu Feto Parlamentar konsidera servisu sentru estudus jeneru iha Parlamentu Nasional durante ne’e ladun funsiona ho diak no seidauk efetivu.
Deputada Ilda Maria da Conçeicão, membru Grupu Feto Parlamentar (GMPTL), hateten sentru ida ne’e estabelese ho objetivu atu fo kapsitasaun ba grupu feto parlamentar, ho asuntu espesifiku sira ba iha feto partidus, feto potensial sira.
“Maibe durante ne’e grupo feto parlamentar deit mak uja hodi halo briefing, antes desloka ba estrangeirus halo vizita ofisial ruma,” Deputada Conceicao dehan, iha Parlamentu Nasional.
Nia dehan,fo-foun loke sentru ne’e iha duni feto partidus politiku balun mak uja, enkontru hodi troka hanoin ba malu, maibe oras ne’e dadaun laiha ema ida mak uja, tanba lokaliza iha invairomentu parlamentu nian, susar ba feto sira atu asesu.
“Bele uja fo formasaun no kapasitasaun ba feto sira no fatin mos ba peskiza ninian, ezemplu; ita bele ba iha ne’eba bolu ekipa peskiza nian hodi hetan informasaun ruma, maibe durante ne’e ladun la’o,” Deputada Conceicao preokupa.
Hatan ba kesaun ne’e, Vise Prezidente Grupu Mulher Parlamentar (GMPTL), Deputada Albina Marçal, rekonese katak servisu sentru ne’e seidauk 100% efetivu, tanba rekursu humanu sei limitadu.
Tanba ne’e, nia husu ba membru GMPTL sira atu fo hanoin no ideias ba malu, haforsa no dezenvolve liu tan servisu sentru ne’e nian liu –liu iha aspeitu troka hanoin no promove igualidade jeneru iha parlamentu rasik.
“Labele koalia iha kotuk deit, tanba sentru ne’e responsabel GMPTL nian. Kapasitasaun ba ami rasik to’o agora seidauk, tanba tempu limitadu liu,” Deputada Marcal dehan.
Nia dehan, durante ne’e “ami sempre hetan briefing husi UN Women no UNFPA kona ba lei violensia domestika, rezulusaun ONU 1325 no seluk tan, kompleta ami nia konesementu atu bele transforma fali ba iha feto sira iha area rural no nasaun seluk,” Vise GMPTL ne’e dehan.
Nia esplika, knar lolos husi sentru ne’e mak ; apoia grupu feto parlamentar nia atividade no programa sira, kria koperasaun diak ho organizasaun feto, agensia sira hanesan UN Women, UNFPA no seluk tan hodi atinji misaun no vizaun ne’ebe iha ona.
Nia informa mos, katak sei iha komplikasaun tanba sentru ne’e rasik laiha responsavel ezekutive ida mak atu jere so iha deit asesor no tekniku nain rua, ba futuru GMPTL sei esforsu atu tau orsamentu oituan hodi halo rekrutamentu ba rekursu humanu atu haforsa servisu sentru ne’e nian.
