Ministeriu Solidariedade Sosial servisu hamutuk ho Komisaun Funsaun Publika fo pensaun ba pensionista hamutuk nain 157.
Sekretariu Estadu Seguransa Sosial (SESS), Vitor da Costa, hateten pensaun ida ne’e hanesan fo seguransa sosial ba trablhadores do estadu hotu-hotu wainhira idade ferik no katuas ona deskansa ho dignidade.
Nia dehan, sertifikadu ne’ebe mak fo ne’e hanesan rekonesementu ba servidor do estadu no servidor do povu.
“Sira kontribui ona ba nasaun durante tinan hirak liu ba, agora sira iha direitu atu ba deskansa hodi hetan reforma no hetan sira nia pensaun,” SE da Costa dehan, iha Dili.
Total Pensionista ne’ebe mak simu ona sertifikadu atu sai reforma hamutuk nain 157 no balun sei iha prosesu nia laran.
Tuir informasaun husi Komisaun Funsaun Publika (KFP), katak funsionariu sira ne’ebe mak tama ona ba lista reforma ninian hamutuk 1.700 resin.
Pensionista reformadu sira ne’e kada fulan sira simu 75 pursentu husi sira nia salariu no sira simu to’o mate.
Iha fatin hanesan Abel da Costa, nudar Funsionariu Publiku iha Diresaun Agua no Saneamentu (SAS) ne’ebe reformadu, sente kontente tanba estadu rekonese ona sira liu husi simu pensaun kada fulan.
“Hau sente kontente tanba hau hetan ona reforma ,” pensionista da Costa dehan.
Nia dehan, nia servisu iha Diresaun Agua no Saneamentu kleur ona.
“Hau nia idade hau konta lolos 60 resin ona maibe foin mak hetan reforma,”nia dehan.
Entretantu Prezidente Komisaun Funsaun Publika (KFP), Komisariu Liborio Pereira, hateten prosesu reforma ba funsionariu do estadu ne’ebe mak hala’o besik nain 400 ona.
Nia dehan, funsionariu ne’ebe mak direitu atu hetan reforma idade 60 anos ba leten.
“Serimonia ida ohin, ita entrega sertifikadu ao mesmu tempu ita despede, tanba sira la ativa ona hanesan funsionariu publiku iha administrasaun publika maibe sira ba deskansa, simu sira nia reforma wainhira sira sei moris tuir lei parlamentu nian koalia kona ba sistema pensaun tranzitoriu,” Komisariu Pereira hateten.
Ba sira ne’ebe mak hetan reforma ona hanesan meus ida husik hela vaga ba ema foinsa’e sira ne’ebe potensial matenek no bada’en para rekruta fali atu nune’e bele dinamiza nafatin administrasaun publika.
