Proposta Orsamentu Jeral do Estadu (OJE) kada tinan sempre tarde tama iha Parlamentu Nasional, tanba ne’e membru Parlamentu Nasional husi bankada Fretilin sujere ba governu atu halo tuir lei haruka iha konstituisaun, nune’e labele fo impaktu ba iha ezekusaun.
Deputadu Inacio Moreira, dehan tuir lolos proposta OJE, governu haruka ba iha parlamentu fulan tolu antes halo debate, atu nune’e parlamentu bele estuda no halo audensias publika.
“Hau mos le’e notisias ne’ebe fo sai dehan $1,5 billoens tanba ne’e ita seidauk hatene lolos ,” Deputadu husi bankada opozisaun, Inacio Moreira dehan, iha Parlamentu Nasional.
“Nia impaktu mak ne’e ita sei estuda oituan deit, halo analiza orsamentu ne’ebe mak sira aloka ho ezekusaun orsamentu jeral do estadu ano korenti ne’e mak tempu limitadu liu,” nia preokupa.
Entretantu Reitor Akademika Universidade Dili (UNDIL), Antonio Cardoso, hateten desde I lejislatura to’o mai iha terseira lejislatura, aprova OJE ho montante bo-bo’ot, maibe barak mak mal gastu ba projetu ne’ebe laiha rezultadu.
“Ita koalia orsamentu ne’e ,osan povu nian, signifika katak ita halo ba buat ruma povu tenke sente nia rezultadu,povu tenke benefisia,povu tenke goza ba dezenvolvementu setor ne’ebe deit,” nia dehan.
Reitor UNDIL ne’e afirma, tempu ona para governu hamutuk ho sosiedade tomak atu fo kontribuisaun, kontrola projetu sira atu iha kualidade diak.
Tanba ne’e nia sujere ba governu, osan povu nian tenke hare tanba dadauk ne’e seidauk iha alternativa ida kona ba sustentabilidade.
“Agora, ita depende deit ba osan husi mina, ita buka gasta deit,” nia dehan.
