Ministeriu Edukasaun iha ona planu atu implementa atividades kintal eskolas no te’in ba iha nivel Ensino Baziku iha tinan oin, ho intensaun atu eduka no introdus aihoris sira ne’ebe fo nutrisaun diak ba saude.
Vise Ministra Edukasaun Ensino Baziku, Dulce de Jesus Soares, hateten atividade ne’e importante atu kontribui hodi hatun numeru mal nutrisaun, tanba Timor-Leste iha aihoris barak mak fo nutrisaun ba saude.
“Maibe konesementu mak sei menus, presiza edukasaun ida apropriadu kona ba nutrisaun hahu husi Ensino Baziku,” Vise Ministra Soares hateten, iha selebrasaun loron mundial aihan, iha Sentru Konvensaun Dili.
Nia dehan, iha reformasaun kurrikulum foun, bele hatama ona materia halo to’os no te’in ba Kurikulum Ensino Baziku, nune’e labarik sira hahu aprende oinsa kuda variedade aihoris oi-oin ne’ebe fo nutrisaun no oinsa tein.
Ba futuru, nia afirma, atividade hanesan sei implementa mos iha Ensino Superior, nune’e estudante sira bele aprende halo to’os no te’in aihan ne’ebe fo nutrisaun diak ba saude.
Alem de ne’e, nia hatutan, ministerio mos sei fo formasaun ba profesores sira kona ba konteudu relevante ba promosaun nutrisaun, ijiene inklui mos seguransa alimentar.
Vise Ministra mos husu ba asosiasaun dos pais sira no profesores sira atu hahu hala’o programa kanteirus eskolas hodi kuda modo no produtu ne’ebe presiza ba menu merenda eskolar nian.
“Garantia sustentabilidade merenda eskolar, atu labarik sira bele hetan nutrisaun ne’ebe diak hodi reforsa sira nia kbi’it no matenek iha ensino aprendizajen, tanba ministerio iha planu atu hadia lutu eskola iha teritorio tomak,” nia dehan.
Iha parte seluk, Prezidente Komisaun F (saude, edukasaun, jeneru, veteranus), Deputadu Virgilio da Costa Hornai, apoia planu ida ne’e, maibe importante mak tenke kondis ho planu asaun annual ne’ebe ministerio iha.
“Ita apoiu deit hodi buat ne’e la’o bainhira programa ne’e la sai husi lei ensino baziku ne’ebe Timor –Leste iha,”Deputadu Hornai dehan.
Entretantu Organizasaun Hiam Health ne’ebe durante ne’e servisu hodi kombate mal nutrisaun iha rai laran liu husi programa edukasaun no kria sentru rehabilitasaun ba labarik mal nutrisaun, Diretora Rosaria Martins, kleur ona rekomenda ba governu kona ba programa ida ne’e.
“Ministerio Edukasaun tenke hatama duni programa ne’e ba kurikulum ensino baziku, tanba liu husi edukasaun mak bele redus numeru mal nutrisaun,” nia dehan.
