Prezidente Komisaun Nasional ba Direitu Labarik, Komisaria Adalgiza Ximenes, hateten numeru labarik involve iha krime oras ne’e dadaun as ba beibeik, ida ne’e akontese tanba familia faila eduka oan sira. 
Nia esplika, Komisaun Nasional Direitu Labarik (KNDL) nia papel mak halo advokasia ba ema hotu liu –liu inan aman sira kona ba direitu labarik nian, maibe edukasaun lolos ne’e mai husi familia sira la’os profesores sira deit tanba labarik nia tempu barak liu ho inan aman.
“Tanba sa labarik sira bele involve kazu sira hanesan ne’e husu ba familia sira, labarik nia tempu barak liu ho sira ba eskola oras balun deit tanba ne’e edukasaun lolos ne’e mai husi familia,” dehan Komisaria Ximenes.
Maske nuna’e nia rekonese, katak governu seidauk halo buat barak hodi hakonu labarik sira nia direitu ba edukasaun, saude no seluk tan, maibe responsabilidade tomak ne’e mai husi familia bainhira familia sira eduka sira ho fuan no domin sira sei sai ema ne’ebe edukadu.
Bazeia ba monitorizasaun labarik minoridade ne’ebe oras ne’e dadaun dadur hela iha prizaun Becora hamutuk nain 25, iha tinan kotuk liu ba labarik nain 20 deit agora komesa sae.
Husi numeru ne’ebe iha maioria labarik sira ne’e komete krime ne’ebe todan, sira tenke kumpri duni pena ne’ebe iha hanesan krime violasaun seksual, omesido, abuzu seksual no seluk tan.
Entretantu, Xefe Departamentu Peskiza Sekretario Estado Promosaun Igualidade (SEPI), Hermino Xavier, konkorda katak familia liu –liu inan aman mak knu’uk ba edukasaun, la’os akademiku sira.
Tanba ne’e nia dehan, bainhira labarik sira la hetan edukasaun no akompaniamentu husi familia, entaun sira foti desizaun ne’ebe afeta ba sira nia futuru hanesan involve iha krime, tara an no seluk tan.
“Ami husu ba inan aman atu labele husik deit labarik sira ba eskola professores sira mak eduka sira maibe ita mak knu’uk primeiru fo edukasaun ba labarik sira,” nia dehan.
