Membru Komisaun F Parlamentar no Grupu Feto Parlamentar iha Parlamentu Nasional husu justifikasaun husi Sekretaria Estadu ba Promosaun Igualidade kona ba kanselamentu alokasaun orsamentu ba Komite CEDAW iha Nova Yorke. 
Membru Komisaun F (saude, edukasaun, igualidade jeneru no veteranus), Deputada Ilda Maria da Conceicao, dehan ne’e orsamentu estadu nian (OJE 2013), tanba ne’e presiza duni halo justifikasaun ba publiku, tanba sa mak kansela.
Nia dehan, orsamentu ne’e atu apoia servisu gabinete Konvensaun Halakon Formas no Diskriminasaun hotu Kontra Feto (CEDAW) bazeia sira nia planu ne’ebe aprezenta iha komisaun no ikus mai SEPI kansela.
“Ami husu prezensa senhora Milena Pires no SEPI mai iha Parlamentu atu klarifika informasaun sira ne’e, para ami grupu GMPTL bele fo hanoin, tanba ne’e orsamentu estadu nian,” Deputada Ilda Maria da Conceicao husu, iha Parlamentu Nasional.
Orsamentu ne’e rasik, nia dehan, dadaun ne’e sei iha hela iha gabinete Sekretaria Estadu ba Promosaun Igualidade (SEPI) nian.
Hatan ba kestaun ne’e Sekretaria Estadu Idelta Maria Rodrigues, katak orsamentu ne’e aloka ba orsamentu annual SEPI nian tinan 2013, liu husi orsamentu tranferensia publika ho montante $300,000 ba CEDAW no $200,000 ba SEPI.
Ne’ebe nia dehan, la’os SEPI mak kansela, maibe liu husi debate Konselho Ministru, deside kansela tiha orsamentu ne’e ba perita CEDAW, tanba orsamentu ne’e planu atu loke sentru estudu jeneru.
“SEPI konsege lori ajenda ne’e ba iha Konselho Ministru debate no ikus mai orsamentu ne’e kansela no fila ba kofre estadu,” SE Rodrigues dehan.
Tanba ne’e nia dehan, pronto atu ba halo justifikasaun ba iha Komisaun F kona ba kanselamentu orsamentu ba iha perita CEDAW (Milena Pires), iha kualker tempu.
“Antes ne’e ami halo ona ajenda atu halo justifikasaun, maibe komisaun F no GMPTL mak kansela orario ne’e,” SE Rodrigues hateten.
