Atu garantia atendementu operasaun ne’ebe diak iha Ospital Nasional Guido Valdares parseirus USAID fo apoia fundus estensaun ba sala operasaun iha ospital nasional hodi responde ba nesesidades ne’ebe iha. 
Diretor Jeral Ospital Nasional Guido Valdares (HNGV), Domingos Soares, hateten durante ne’e sala operasaun iha deit sala rua tanba ne’e dificulta servisu medikus sira nian atu halo operasaun ba pasientes.
Nia dehan, prosesu konstrusaun estensaun ne’e atu aumenta tan sala ida no armagen ida, atu nune’e bele fo atendementu operasaun ba pasiente sira liu –liu kazu emergensia sira.
“Nesesidade operasaun oras ne’e dadaun barak liu kompara ho tinan hira liu ba,” DJ Soares dehan, iha lansamentu primeira pedra ba estensaun sala operasaun HNGV iha Bidau, Dili.
Iha parte seluk, Diretor Kompania Afi Hini Unipesoal. Lda ne’ebe kaer projetu ne’e, Arsenio Fernandes, promete katak sira sei finaliza konstrusaun ne’e tuir kontratu ne’ebe iha, durante fulan lima nia laran.
“Ne’e garantia, servisu ne’e sei remata iha fulan lima nia laran masimu,” Fernandes dehan ho konfidensia.
Nia hatutan, katak materia konstrusaun ba sala operasaun ida ho armagen ne’e sei mai husi Indonezia ne’ebe sei to’o iha dia 18 Outubru ne’e atu hahu halo konstrusaun ona.
Xefe Departamentu Sala Bloku Operatoria Anastesia HNGV, Abilio de Oliveira, katak durante ne’e sira infrenta duni sala tanba sala ne’ebe sira uzja rua deit maibe kada loron ida sira fo asistensia operasaun ba pasiente hamutuk nain 12 la sura ho kazu emergensia sira.
Nia hatutan, katak oras ne’e dadaun sira iha ona medikus hamutuk nian 20 resin no ekipamentus ne’ebe sufsente atu halo atendimentu ba pasiente sira problema mak sala.
“Liu –liu ita nia inan sira ne’ebe mai labele partus normal liu husi sejariana injection ida ne’e mak kuaze maioria inklui mos kazu asidente,” Oliveira katak.
Entretantu, Vise Ministra Saude, Maria do Ceu Sarmento Pina da Costa, hateten ministeriu tau ona orsamentu ba tinan ida ne’e hodi sosa ekipamentus sala operasaun nian.
“Governu tau ona orsamentu 2013 ne’ebe nia prosesu tenderizasaun lao hela oras ne’e dadaun halo hela avaliasaun atu hatama ekipamentus meja, lampu operasaun atu halo funsionamentu servisu operasaun,”Vise Ministra Ceu dehan.
Alem de ne’e m, nia hatutan, USAID mos apoia ona konstrusaun hanesan sentru saude distritu Ermera, Ospital Referral Oe-Cusse, Uma Maternidade distritu Manatuto ne’ebe oras ne’e dadaun la’o hela.
