Membru Parlamentu Nasional konsidera professor sira iha eskola Ensino Baziku Sentral Maubara viola ona labarik sira nia direitu, tanba haruka estudantes lori ai husi uma hodi lutu eskola nian.
Deputadu César Valente de Jesus, hato’o kestaun ne’e tanba distansia uma ba eskola ne’e do’ok no sira tenke tutur ai ba to’o eskola ho la’o ain deit.
Nia apresia ho inisiativa profesores ne’e, maibe ida ne’e servisu konselho dos pais nian atu konvoka inan aman sira kontribui ba eskola, la’os haruka fali labarik sira mak tenke hulan fali ai ho distansia ida ne’ebe dook.
Tanba ne’e nia husu ba Ministeriu Edukasaun atu hare lalais kestaun ne’e no foti desizaun ne’ebe pozitivu hodi resolve problema ne’e. Estadu ratifika ona Konvensaun Internasional Direitu labarik nian tenke respeita labarik nia direitu.
“Ne’e ita viola labarik sira nia direitu tanba labarik sira lori ai ho distansia do’ok lao ain mai han sasor tan,” Lamentasaun sira ne’e hato’o husi Deputadu Valenti iha sesaun plenaria foin lalais ne’e.
Iha parte seluk, Komisaun Nasional Direitu Labarik (KNDL), Komisaria Adalgiza Ximenes, hateten koalia kona ba direitus humanus la’os buat hotu labele halo, bele, maibe depende ba situasaun no servisu ne’ebe professores sira haruka.
Nia dehan, haruka labarik sira lori ai ki’ik ida hodi halo lutu haleu eskola, ne’e la’os viola labarik nia direitu maibe atu hanorin sira sai kreativu. Se professores sira haruka labarik sira lori ai ida ne’ebe bo’ot (todan) mai la halo lutu ba fali interese pesoal seluk ne’e viola labarik nia direitu.
“Se lori ai halo lutu lapresiza lori ai bo’ot se ai ki’ik ida mai hodi hanorin sira oinsa halo lutu ida diak ne’e normal laiha buat ida atu ajuda labarik sira sai kretivu,” dehan Komisaria Adalgiza iha nia servisu fatin Colmera Dili.
Nia dehan, labarik sira agora ne’e ba eskola ba los deit, laiha atividade ida ne’ebe atu halo sira sai kreativu tanba ne’e inisiativa ne’ebe diak atu hanorin sira sai kreativu maibe tenke hare mos situasaun.
