Tribunal Distrital Dili (TDD) halo julgamentu ba kazu violensia domestika ne’ebe involve Arguido ho Inisial JF. Arguido sempre baku JVD (nia fen) bainhira hemu lanu.
Kazu ne’e rasik akontese iha tinan 2010, iha suku Fatuhada, sub-distritu Dom Aleixo, distritu Dili,. Tribunal prova katak arguido sempre halo violensia domestika hasoru lezada JVD wainhira lanu.
Ba kazu ne’e rasik TDD kondena arguido ho pena suspensaun tinan ida, tanba hahalok ne’ebe arguido halo ba lezada ne’e kategoria krimi publiku.
Entretantu vitima JVD, deklara iha tribunal katak arguido sempre fila tuku lima madrugada no kuandu fila ona sempre ho kondisaun lanu.
“Depois to’o uma sempre baku sasan sira ne’e arbiru, kuandu hau koalia, baku hau,” deklara vitima JVD.
Nia dehan, iha altura ne’eba iha dia 15 Setembru 2010, arguido fila ho lanu, maibe ladun lanu todan, tuku odamatan to’o at, no iha liman kaer hela ai ki’ik oan, depois vitima hasee, no arguido uja ai ne’e baku vitima nia ulun.
“Nia tama iha dapur no foti aisanak iha ahi matan no baku hau no ai klak ne’e kona hau nia ain to’o bubu, no hau ba kesar polisia,” vitima JVD deklara.
Iha oportunidade hanesan, arguido JF mos rekonese hahalok ne’ebe nia halo ba vitima, nia arepende hahalok sira ne’e no deklara ba tribunal hodi la repete tan asaun ne’e.
“Hau halo duni hahalok sira ne’e tanba hau lanu, maibe agora hau nunka baku tan nia,” dehan arguido JF.
Durante tinan hat prosesu judisial lao hela, maibe vitima no arguido hela uma ida nafatin hodi hare ba nesesidade uma laran no oan sira.
