Membru Parlamentu Nasional kritika maka’as Kompania Estrada Bo’ot Diak (EBD) ne’ebe halo estradas laiha kualidade, foin halo tinan ida at tiha fali.
Deputada Ana Ribeiro, hato’o kestaun ne’e tanba estrada iha Loja Jacinto nia oin, uluk halo tiha, maibe at fila fali, nune’e mos estrada Bairo-Pite no Kuluhun nian.
“Ne’e hanesan pratika soe- soe osan deit, tanba estrada halo tiha, laiha kualidade maibe hasai osan ba bebeik,” Deputada Ribeiro kritika, iha Dili.
Tanba ne’e nia husu ba kompania ne’ebe kaer projetu ne’e atu halo obra ida tenke halo ho seridade no tenke iha kualidade.
Nia mos apela ba governu, tenke toma atensaun ba kompania sira ne’e, atu nune’e wainhira hira halo estrada, tenke ho kualidade diak.
Hatan ba kestaun ne’e Ministru Obras Publik (MOP), Gastao de Sousa, hateten iha estrada balun kompania ne’e halo la diak, maibe balun halo ho kualidade, maibe ministeriu sei toma atensaun.
“Hanesan Dili-Manatuto, sira halo to’o agora sei diak, agora ami fo ona atensaun kuandu halo fali mak la diak, hau iha poder tomak atu hapara kontratu,” Ministru de Sousa hateten.
Agora dadaun, nia dehan, iha sistema foun, ba kualker kompania kuandu halo obra ida laiha kualidade, governu sei la halo pagamentu ba kompania refere.
Entretantu Xefe Kompania Estrada Bo’ot Diak, Ilidio Cardoso, hateten sira nia kompania halo obra sempre iha kualidade, maibe problema udan deit.
“Udan mak estraga estrada sira ne’e,” Xefe Cardoso dehan.
Kona ba governu sei la halo pagamentu bainhira obra laiha kualidade, nia dehan, laiha problema no sira aseita.
