Sekretario Konselho Diretarivu Nasional Cruz Vermelha iha Timor –Leste (CVTL), Virgilio da Silva Guterres, hateten ekipamentus Primeirus Sekorrus ou Pertolongan Pertama Pada Kecelakaan (P3K) ne’e importante tebes ba konsumidores transportes, tanba bele salva sira nia vida bainhira hetan asidente. 
Guteres dehan, iha Timor –Leste maioria ema seidauk tau importansia ba primeiru sekorrus liu –liu motorista sira, tanba maioria transportes tantu privadu no publiku la prepara ekipamentus primeiru sekorrus iha kareta laran.
Nia hatutan, sira sei halo kampania kona ba asuntu ida ne’e ba iha Polisia Tranzitu nian inklui mos ho Diresaun Nasional Transportes nian.
“Transporte sira tenke iha ekipamentus Primeiru Sekorrus, diak liu prevene duke akontese tiha ita buka la hetan,” Sekretariu Konselho CVTL, Virgilio da Silva Guterres dehan, iha selebrasaun loron internasional Primeiru Sekorrus, iha Timor Plaza, Dili.
Selebrasaun loron internasional P3K iha tinan ida ne’e ho tema “Primeiru Sekorrus no Seguru Estrada”, fo hanoin ema hotu asegura sira nia moris durante halo viajen ho transportes, tanba sirkulasaun transportes husi loron ba loron aumenta.
Nia informa, katak sira laiha dadus espsifiku kona ba Timor –Leste maibe tuir estatistika global hatudu katak ema 50% hetan dezastre no mate, tanba la hetan asistensia primeiru sekorrus.
Entretantu, Adjuntu Polisia Tranzito Nasional, Valentino Soares durante ne’e akontese asidente barak, no vitima sira la konsege salva sira nia vida tanba la hetan Primeiru Sekorus.
Alem de ne’e nia dehan, maioria transporte sira ne’ebe halao sirkulasaun iha rai laran, lai= kompleta ho kotak P3K, entaun susar oituan bainhira atu halo evakuasaun ho lalais.
“Iha enkontru ida liu ba ami koalia ona oinsa tau ekipamentus primeiru sekorrus iha kareta publiku no privadu sira nia laran,” Adjuntu Soares katak.
Dadaun ne’e nia hatutan, sira planea ona atu fo treinamentu P3K ba membru Polisia Tranzitu no Bombeirus sira, atu sira mos iha konesementu oituan hodi bele ajuda vitima sira hodi hein ambulansia evakua.
Nia mos husu ba Diresaun Nasional Transportes no Terestres (DNTT) atu kria mos segurus taxa asuransia, bainhira ema hetan asidente tohar ou mate iha mos osan ida apropriadu atu ajuda sira.
