Kazu mal pratika ne’ebe rezulta ema ida mate iha Ospital Nasional Guido Valadares, foin lalais ne’e, Polisia Servisu Investigasaun Kriminal seidauk bele halo investigasaun, tanba sei hein despaixu husi Ministeriu Publiku.
Xefe Interino Servisu Investigasaun Kriminal (SIK), Manuel Alves hateten, husi parte polisia investigasaun hato’o ona informasaun no relatorio ba iha Ministerio Publiku kona ba kazu ne’e.
“Hein katak bainhira depaisu husi Ministeriu Publiku tun, foin bele halo prosesu investigasaun ba iha ita nia doutor sira ne’ebe iha momentu ne’eba fo hela atendementu,” Xefe Interino Alves dehan, iha Kaikoli, Dili.
Lolos SIK foti kedas informasaun klaru iha momentu akontesementu ne’e, maibe nia dehan seidauk bele, tanba atrapailha husi familia vitima ne’ebe barulhu los.
Kona ba ema nain hira involve iha kazu ne’e, nia hateten seidauk hatene, maibe konserteza medikus ne’ebe momentu ne’eba fo hela atendementu hodi rezulta vitima mate.
Akontesementu ne’e akontese iha sala emergensia HNGV, dia 19 fulan Setembru 2013, ne’ebe rezulta pasiente Erosfita Fine mate, tanba deskonfia mal pratika husi medikus Cubanu balun.
Erosfita Fine (39), iis kotu hafoin estudantes estagiario medisina nain rua ne’ebe sona aimoruk ba vitima, bazeia ba reseitas ne’ebe medikus Cubanu fo.
Iha parte seluk, Diretor Klinika HNGV, Aniceto Barreto, hateten oras ne’e dadaun medikus Cubanu ida ho estagiario nain rua ne’ebe momentu ne’eba fo atendimentu oras ne’e dadaun sei kontinua halao servisu hanesan medikus no estagiario, tanba seidauk foti desizaun.
“Hau hanoin investigasaun la’o hela tanba ne’e investigasaun mak sei lori ita ba iha konklusaun ida,” Diretor Kliniku HNGV ne’e.
Entretantu, Deputada Ilda Maria da Conçeicão, hateten ho akontesementu ne’ebe akontese halo komunidade sira tauk atu ba halo tratamentu iha HNGV, tanba ema ba diak hela maibe mate iha medikus sira nia liman.
“Tenke halo investigasaun, hau la hatene familia vitima mos bele lori kazu ne’e ba iha tribunal tanba ne’e ema mate ne’e,” Deputada Ilda dehan.
