Iha Distritu Baucau, komunidade barak mak seidauk asesu ba eletrisidade, tanba ne’e husu ba governu atu bele toma atensaun ba ida ne’e.
Xefe Suku Kaibada, Antonio Francisco Belo hateten, eletrisidade iha parte Kaibada, agora dadaun hadia hela fiu maibe prosesu ida ne’e besik tinan tolu ona e seidauk hotu.
“Iha hau nia suku rasik, iha aldeia lubuk ida maka seidauk hetan ahi,” Xefe Suku Belo preokupa.
Tanba ne’e, nia husu ba ministeriu relevante atu hare asuntu ne’e ho seridade, tanba kestaun ne’e importante.
Iha parte seluk Deputadu Francisco da Costa hateten, preokupasaun hirak ne’e, nudar kestaun ne’ebe mak lor-loron deputadu sira hato’o iha plenaria.
“Hau hanoin governu sei iha esforsu nia laran, atu hare kona ba asuntu sira ne’e, ita hare iha distritu balun, eletrisidade komesa lakan 24 oras,” Deputadu da Costa dehan.
Hatan ba kestaun ne’e Administrador Distritu Baucau, Antonio A. Ximenes, rekonese katak iha Baucau iha sukus hamutuk 59 no iha duni sukus hamutuk 18 mak seidauk asesu ba linha eletrisidade.
“Iha ona 41 sukus maka hetan ona eletrisidade , 18 sukus maka seidauk hetan ahi,” Administrador Ximenes dehan.
Nia mos hatutan katak, maibe ba komonidade sira ne’ebe durante ne’e seidauk hetan ahi, sira ho pasensia atu uja kamii, lampu lilin, atu resolve sira nia problema ahi.
“Ami sei nafatin propoin lista ne’e nafatin, xefe suku sira divia nafatin e ami rekomenda nafatin, depende politika governu sentral nian tun mai ami asegura,” dehan administrador ne’e.
