Planu atu hari provizoriu ba inan sira ne’ebe mai husi distritus partus iha Ospital Nasional Guido Valadares, Primeira Dama Timor-Leste, Isabel Fereira, hateten, nia sei halo lobi ida ba emprezariu bo’ot sira kona ba projetu ne’e.
Nia dehan, ne’e hanesan hanoin ida ne’ebe tama iha programa Primeira Dama nian, maibe seidauk fiksu, tanba presiza tempu atu converse ho emprezario sira.
“Sei iha hela faze lobby, se mak laran diak bele ajuda halo uma ba inan sira ne’ebe mai husi distritu atu partus, ne’e idea ida tama iha hau nia programa atu halo mos hanesan hau ajuda rehabilita sentru saude sira no halo kadeira meja ba eskola area rurais balun,” Primeira Dama Fereira dehan, iha Dili.
Inisiativa ida ne’e mosu bainhira, nia halao vizita ba iha Ospital Nasional Guido Valadares (HNGV) liu –liu sala maternidade hare difisil ba inan feto sira ne’ebe laiha uma no familia iha Dili, tanba ho kondisaun sala maternidade ne’ebe iha la sufsiente atu akomoda hotu inan isin rua sira.
Inan ba nasaun ne’e mos, hateten iha kompania barak mak iha hanoin atu ajuda, tanba realidade iha kompania ida husi Indonezia mak ajuda ona halo rehabilitasaun Sentru Saude Darlau, ajuda kadeiras no meja ba eskola sira iha area remotas.
Nia hatutan katak oras ne’e dadaun halo hela angarasaun fundus ho emprezario sira atu ajuda kadeiras no meja ba eskola sira iha area remotas, nune’e mos ba hanoin ida ne’e.
Iha parte seluk, Diretor Jeral HNGV, Domingos Soares, hateten sira HNGV pronto atu oferese fatin atu Primeira Dama halo uma ida ba inan feto sira no familia pasiente sira ne’ebe mai husi do’ok hodi hela ba, tanba ospital laiha fasilidade ne’ebe sufsiente atu akomoda ema hotu liu –liu familia pasiente sira.
“Fatin iha hela ami nia tekniku sira sei halo proposta ida ba permeira dama hodi harii fatin ida ne’e ba inan sira no familia sira ne’ebe mai husi do’ok hela ba hodi hein pasiente sira,” DJ Soares hateten.
