Sekretariu Estadu Asuntu Kombatentes no Libertasaun Nasional, Julio Sarmento da Costa Meta Mali, hateten,iha fulan ida ne’e nia laran ekipa verifikasaun sei tun tan atu verifika dadus veteranus 2013 ninian.
Nia dehan, planu ida ne’e programadu ona no hein para tun ba halo verifikasaun ba dadus veteranus nian.
“Komisaun Homenajen hamutuk ho sekertariu estadu ami prepara tiha ona enkontru liuba kotuk ami atu halao knar rekursu sigundu nian para finalija tihan dadus setembru 2013 nian,” SE Meta Mali iha Palacio Presidenti, Aitarak Laran , Dili .
Entretantu Luis Camoes de Araujo, nudar veteranu ne’ebe mak hetan ona rekonesementu husi estadu iha 20 Agostu 2013, sente triste oituan tanba to’o agora veteranus balun seidauk hetan rekonesementu husi governu ba sira.
“Haut anis matan been tanba estadu atende ona ami tama iha desmobilizasaun, mais ami nia maluk balun to’o agora ruin sei naklekar hela maibe estadu no governu sidauk rekonese,” Veteranus Araujo preokupa.
Nia dehan, sira mate iha funu laran, la’os sira nia hakarak maibe tanba defende rai no povu ida ne’e mak to’o ohin loron ukun an sai nasaun soberanu ida.
“Funu ne’e la’os ba ami nia an deit, maibe funu ne’e ba ita Timor tomak,” nia dehan.
Iha sorin seluk Veterana Saturninha Alves da Silva alias Hili –Kasa husi distritu Viqueque, sub-distritu Uatu-Lari hateten, tempu uluk la hanesan ho tempu agora.
“Fo ona rekonesementu ba ami ne’e los ona, maibe fila fali ba ami nia oan sira nia moris oinsa, ami ladun hatene,” veteran Hili-kasa katak.
Tuir nia, Lei Veteranus nian ne’ebe oras ne’e dadauk vigor ladun fo valorizasaun ba veteranus sira.
“Se ami simu ami nia la’en ninian to’o tempu ami mate tiha, ami nia oan sira la simu fila fali tiha ona,signifika katak la fo valorizasaun ba ema sira ne’ebe mate,”Hili-kasa preokupa.
Tanba ne’e nia sujere ba governu atu reve fila fali lei veteranus ninian, atu nune’e bele fo rekonesementu mos ba veteranus no martires sira nia oan.
