Organizasaun Naun Governamental (ONG) Nasional Judicial System Monitoring Program (JSMP) konsidera Parlamentu Nasional to’o oras ne’e dadaun sei budu deit lei hat ne’ebe konsidera importante, hanesan Lei Alterasaun ba Lei Pensaun Vitalisia, Lei Institutu Memoria Publika, Lei Korupsaun, no Lei Rai.
Tuir Director JSMP, Luis de Oliveira Sampaiu, hateten agora dadaun tinan ne’e atu besik remata ona, maibe lei hat ne’e seidauk tau ba agenda parlamentar.
“Tanba entre lei hat ne’e, iha lei balun kaduka tiha ona [tempu liu ona]. No hanesan Lei Rai ne’e importante tanba ita hare agora ema oho malu tan rai, maibe seidauk halo diskusaun mos, to’o agora” dehan Director JSMP Sampaiu, iha nia knar fatin, foin lalais.
Nia mos dehan, hare ba kondisaun Timor agora ne’e,korupsaun mosu barak, povubalun sei susar tebes, no tuir los antes halo lei seluk, Parlamentu Nasional tenke halo lai aprovasaun ba lei hat ne’e.
“Tanba ne’e ami hanoin se sira antes tama iha lei foun sira tenke ramata tia lei ne’e, tanba agora ita hare korupsaun ne’e buras tebes, no involve directores, Ministru, no eis ministru.
No presiza halo mos alterasaun ba lei pensaun vitalisia.”
Iha lidun seluk Deputada Josefa Alvares Soares hateten, hanesan Lei Institutu Memoria Publica uluk konsege diskuti duni maibe suspende tia, tanba Parlamentu Nasional halo lei seluk nebe prioridade liu hanesan Lei Veteranus.
“Ulukveteranus barak seidauk simu sira nian osan, entaun sira barak mak mate tan deit hein simu osan, entaun ami hare ida ne’e mak prioridade. Ami suspende tia Lei Institutu Memoria Publica, no diskuti Lei Veteranus” dehanDeputada Soares, iha PN.
Nia haktuir tan katak karik lei sira ne’e bele reajenda fali hodi halo diskusaun iha fulan hirane’e nia laran, antes tinan ne’e remata.
“Hau foin lalais rona husi Presidente Parlamentu Nasional mos kestiona konaba ida ne’e, nebe ita hare deit kuandu lei hat ne’e maka reajenda fali ita bele diskuti.”
Entretantu Deputadu Mateus De Jesus heteten,lei ne’e laos haluha tia, ou atu abandona, maibe parlamentu hanoin katak iha lei seluk mak agora dadaun sei sai prioridade hela atu aprova, depois de aprova tia lei sira ne’e, maka koko atu hare tok ba lei hat ne’e.
“No sei hare fali entre lai hat ne’e nebe maka importante liu,” hatutan tan Deputadu Mateus.
